Az.R -ədə bə dini mərasimon əleyh nubəti antiislamə ğanun

Az.R Parlamentədə "Bə hırdənon saleməti və inkişafi ziyanvardə informasiyaku muhafizə həxədə" ğanuni layihə hozo kardəşone. Bı nezonədə MM sessiyon qıleyədə muzakirə bənine. Im ğanunədə hırdənon dini mərasimonədə iştiraki ğədəğən karde ehtiva bedə.

De ım məsələ əlağədar AİP sədri muavin Emil Rahiloğlu bə "İslamınsesi" sayti votəşe ki, ım hokuməti joqo bızın ğeyr-əz islami həni co dard nişe. Bəştə tolerant votedən, əmo əhali mutləğ əksəriyyəti şiə bıə məmləkətədə bə çəvon əleyh ğanunon ğəbul kardedən. Jıqo hərəkəton bə Əhli-beyt (ə) məktəbi munasibətədə deşmençiətiku xəbə dodə. Əmə ım ğanuni mahiyyəti bəştə əğılon izahatədə bəvotemon ki, ım hokuməti və deputaton pidəşone ki, çəmə fərzəndon əyyaş, fəssot, mənəviyyatədə zəif yol bıbon. Məcit elm, tərbiyə, mənəviyyati təbliğ kardə qıley məbəde. Əyo bə əğılon inkişafi hiç qıley ziyan be nibəzne. Dınyo hiç qıley məmləkətədə bəştə əhali munasibətədə jıqo murtəce ğanun ni. Im çoko bedə ki, əğılon bə ərəğ və eyş-iştət məclison barde ğədəğən ni, əmo bə dini məşlison barde ğədəğən bənine.

İlahiyyatçi-ədib Famil Burxanoğlu votəşe ki, hırdənon hələ bağça vaxtonku bə muxtəlif ərəb, hind, aerobika rağs məşğəlon cəlb kardedən, umumtəhsil məktəbonədən muxtəlif biədəbə hərəkətono ibarət rağsə dərnəqonədə iştirak bə çəvon mənəviyyati məqər mənfi təsir  nişon nibədo, əmo sofə mənəviyyat təbliğ kardə dini mərasimonədə iştirak bəvon çı cur mənfi təsirış bıe bəzıne?

Bə təhsili dair media ekspert, şərğşunas Vusal Hətəmov isə bə ım məsələ ıştə munasibət de ironiya və sarkazmi votişe ki, əmə çimi bəpeşt bəpe bəştə əğılon avtoxuliğanəti omutəmon, çəvonədə bemusiği ıştə bədəni oşande-oşande raxs kardə mutrubon perosniəmon.