Cinayətə Məcəllədə humanistə əvəzon bə çiçi xidmət kardedə

Oktyabri 20-minə ruji iclasədə Milli Məclisi Cinayət Məcəllədə xeyli əvəzon ğəbul kardışe. Əmo bı barədə Respublika KİV-ədə mufəssəl məlumat nıdonən, ım hərəkəti məntiği nəticə cəzo-islah sistemi humanist kardeyədə vində bedəbe. Həm ım əvəzon Parlamentədə ğəbul bıe ərəfədə, həmən çey ğəbuli bəpeşt dəvardə kutoə muddətədə Az.R məhkəmə hakimon bekardə hokumon nəzər səğandeədə vəziyyəti canədə bə co səmt istiğamət peqəte oşko vində bedə.

Məmləkəti mass-mediadə, orəxnə vaxtonədə xeyli odəmon ki, de dələdızdəti maddə ittiham bedəbin, de məhkəmə ğərari azad be, və ya de şərti cəzo azad karde həxədə xeyli fakton hestin. Meydan TV oktyabri 24-ədə xəbə doşe ki, Boku şəhəri Prokurotura mustəntiğ Muşfiğ Abbasov ki, de ıştə səlahiyyətku sui-istifdə və dələdızdəti maddon ittiham bedəbe, Səbayil rayoni məhkəmə bo eyo zindonəti de kə dustəğəti əvəz kardəşe.

Əmo həmonə ruji Nərimanov rayoni məhkəmə dini fəal Əhsən Nuruzadə ki, de nəşə həvate maddə ittiham bedə, çey bə kə dustəğəti vadoe xahiş rədd kardışe. Hərçənd ki, ım ittihami bıhton be har qıley beğərəzinə odəmiku hiç qıley şubhə bə əməl vardedəni.

İyən həmonə ruji Ğərədağ rayoni məhkəmə "Loti Ğoli" təxəlluxinə Nadir Səlifov çe zindono 5 sor bə nav azad kardışe. Əv bə muxtəlif residiv cinayəton qorə 27 sorinə zindonə cəzo kəşedəbe. Nə Ədliyyə Vəzarət, nə Penitensiar Xidmət ey bə kom səbəb azad karde barədə hiç qıley məlumat nıdoşone.

"Vətən uğrunda" sayt dini məhbus Xalid Kazımovi jimoni xəto vədə mande həxədə nıvıştedə ki, çey səhhətədə problemon heste, çəşonış vindedəni. Kazımovi nezə odəmon bə respublika içtimaiyyəti bo Xalidi jimoni xilasi ro komək nişon doe xahiş kardəşone. Xalid Kazımov de diqər 7 nəfər dini fəali bahəm 2012-minə sori Masalu şəhərədə dəstqir kardəşone, Lankoni Qonə cinayəton məhkəmə bo eyo 8 sor zindonə cəzo bıriəşe.

Umumən vey marağine ki, Az.R Ədliyyə sistem məhkəmon dələdızdon, residiviston azad karde, əmo  de ıştə jimoni qin kardə xəto vəbəvə mandə dini məhbusi azad nıkarde presedinti çı cur izah bəkarde?