Bərdə polisi dini fəal dəstqir kardəşe
Oktyabri 25-minə ruji Bərdə rayoni polison dini fəal Elşən Abbasov dəstqir kardəşone. "Vətən uğrunda" sayt de ım məsələ əlağədar Daxili Koon Vəzarəti məlumat bə əhandon nəzə rosnəşe. Əyo votə bedə ki, şəhrıvand Elşən Abbasovi Bərdə rayoni polisi tərəfo dəstqir karde səbəb çey səpe qıley "Naqan" markaninə hafttir, 1 qılə patron, 1,9 ğrəm nəşə peğəteye.
Çey avtomobilədən 1 qılə qumbara, 1 qılə çaxu, qıleyən lomb peydo kardəşone. De ım fakti əlağədar bə Abbasovi əleyh cinayətə ko bino bıə.
Elşən Abbasov 2011-minə sori mayə manqi 6 -minə ruji Təhsilə Vəzarəti vədə "Hicabiə azadi" aksiyadə dəstqir bıə 15 nəfərədə qıleye. Bə vaxti əv bə 2 sorinə zindonə cəzo məhkum bıəbe.
Vəkil Cavad Cavadov 17-minə koloniyadə de nomojə məhbus Şeyx Sərdar Hacıhəsənli, Ğobustani zindonədə de Taleh Bağırzadə, Mevsum Səmədov və Abbas Huseynovi didor kardəşe. Ey sosial səbəkədə nıvıştəşe ki, Şeyx Sərdar, Hacı Taleh və Hacı Mevsumi ıştə səhhət və zindoni şəraitiku şikayət nişone, əmo ovi de fasilə xeyli kam doe səbəbiku notəmizə vəziyyət bə əməl ome votəşone, həmən bəştə həmməsləkon səlom vığandışone.
Abbas Huseynovi votəşe ki, de işqəncə fakton əlağədar Ğərədağ rayoni mustəntiğı çeyku izahat səşe, məhkəmə-tibbi eksperti əv muayinə kardəşe. Əmo çey zindonə şərait vey bərbad vəziyyətəde. Kameradə melı-məvuşon, muşon nəvedən. Lınqə ro kamera dılə'də ojə vəziyyətədə, həmən bə zindon ovi sutkadə cəmi 2-3 saat doe səbəbiku əyo həmişə buəvulə bedə. Zindoni mudiriyyəti çey kamera əvəz karde vəd kardəşe, əmo icra kardəş ni. Çey abunə bıə rujnomonən bey dodənin.
