Az.R-ədə çanədə məhbus heste

Az.R-ədə 2016-minə sori məhbuson umumi miğdar 23 həzo 311 nəfər bıə ki, çəvon 3% jenə məhbuson bıən. Bə əhali har 100 həzo nəfəri 239 məhbus eqınedə ki, bı nəticədə Azərbaycan Avropa məmləkəton arədə 7-minə, postsovet məkanədə 3 -minə vırədə ğəror ğətəşe.

Vəkil Cavad Cavadov "Azadlıq.info" saytədə nıvıştedə ki, 1993-minə sori 10 həzo 782 nəfər ittihambəkəsonədə 4 158 nəfər, yəni 38% bə zindonə cəzo məhkum bəbebu, 2016-minə sori ım rəğəm bə 57 % ros bıə.

Ponə sori bə dızdiə əməli qorə məhkum bıə məhbuson miğdar bə 2003 -minə sori nisbətədə 2 kərə ziyod bıə. Dəvardə sori de mayə manqi 6 -i ğanuni dızdiə cinayətə hərəkəti məbləğ çe 30 mənotiku bə 100 mənot ros kardışone, əmo ımi əks nəticə doşe, dızdıə cinayətə hərəkəton miğdar həniən ziyod bıe. Vəkil Cavadov votedə ki, ısət dızdiə cinayəti məbləğı 100 mənotiku bə 500 mənot ros kardeədə məğsəd məmləkətədə dızdiə cinayətə statistika bə kam kardeye.  Əqər iğtisadiyyat real inkişaf bıko, əhali quzəran və firəvanəti təmin bıbo, əlbəttə ki, cinayətə hərəkət və məhbuson miğdarən şe-şe kam bəbe. Məsələn, Niderlandədə əhali jimoni barzə səviyyə təmin be səbəbiku cinayətə əməlon miğdar sorbəsor kam bedə. Orəxnə 3 sorədə əyo 19 qılə zindonxonə dəbastəşone.

 Cavad Cavadov həmən ğeyd kardedə ki, MM-i bə Cinayətə Məcəllə kardə 300 qılə əvəz və əlavon mutərəğği qıley qəme. Əmo jıqo  mexanizm hozo karde lozime ki, ce ım humanistə əməliku sui-istifadə karde mumkun nıbo. Həmən bə dini təbliğat, dini mərasimon təşkil karde dair maddonədə bə zindon dənoe de inzibati cəzo,  və ya de azadiyəti səpe məhdudiyyət noe əvəz bənine.