SOCAR - i reytinq saru eqınidə
Az.R iğtisadiyyatədə çey Devlətə Natə Şirkəti , yəni SOCAR-i mustəsna rol hestışe, çunki məmləkəti budcə mədaxilon niməsə vey nati həvateku bə sə omedə. Bə səbəbən ım Şirkət çe keşvəri iğtisadiyyati ovəynə, həmən çey barometre.
"Azadlıq.info" xəbə dodə ki, "Standard & Poors” beynəlxalqə reytinqə aqentiyyət çe SOCAR-i dırozmuddətinə reytinqə səviyyə saru eğandəşe, proqnoz doəşe ki, hələ 2 sorən şirkətədə vəziyyət ım cur bəbe.
Jıqo behraninə vəziyyəti səbəbiku, ışət bə çey istiğrazon bovən xeyli bə kam bıə. Ponə sori Şirkəti bə devriyyə vadoə ğıymətinə koğəzon əhali arədə anəhoyən bə etimadi səbəb nıbe. İğtisadşunas ekspert Əkrəm Həsənovi votəşe ki, əhali hətto bankonədə ıştə sığortəninə əmonəton bə dumo se zınedənin, bə SOCAR -i sığorta nıbə, betəminatinə istiğrazon çoko bovə karde bəzınen.
Orəxnə həftədə im natə şirkəti muəssisonədə 2 qılə ğəzo nəticədə 1 nəfər tələf bıə, 2 nəfərən de qonə xəsarəti bə mərizxonə eqıniə. Natəvonon Huğuğon Mudafiə Komitə sədr Mirvari Ğəhrəmanli bə Meydan TV votəşe ki, Sokarədə ıştə koy zınə əsil mutəxəssison nıbe səbəbiku rə-rə jıqo ğəzoon vağeə bedən. Rəhbəriyyət əksərən ıştə əvlod və ğohomon bə ko peqətedə. Bə qorə salemə koy şərait soxte ro hiç kəs səy nişon dodəni. Məsul odəmon ıştə kresloədə rohət nıştən, nırəsə cəhəton çe arə barde ro hiç qıley səy nişon dodənin. Ğəzo səbəbon jıqo izah kardedən ki, quya ovdonon kanə bıən. Əmo ım məsələ otırniədə məlum bedə ki, bə çəvon təmir və əvəz karde ro xeyli vəsait xarc kardəşone. Tosə ısət çanədə ğəzo bıə, çımon nəticədə çanədə fəhlon tələf bıən, əmo bımi məsul şəxsondə bə hiç kəsi dair hiç qıley tədbir vindəşon ni.
