Bə Ərbəini zəvvaron xidmət barzə səviyyədə təşkil kardəşone

Imsornə Ərbəini ziyarət har soronsə de şevğ və əzəməti dəvardedə. Rəhbər Seyid Əli Xameneyi de ımi əlağədar votışe ki, ımruj bo Seyyidi - Şuhəda dəvunə əzadarə mərasim sa sor bə navonəkionsən hərarətin, cazibədar, de şevğ və izdihami dəvardedə. Hərçənd ki, bəvədə çe xalği dino-imoni danə ımrujnə deşmenış nıbe.

Imon həmə de Huseyn ibn Əli (ə) rəhbərəti ım hərəkati tikiən qışot, yəni hevuj bıe nişon dodə. İnşaallah, ım hərəkat həniən bə nav bəşe, maneon dəf bəkarde, xalqon mışğılon çe arə bəbarde.

Ərdəbili imom cumə Ayətullah Amiliən bə Ərbəin səfəri barzə ğıymət doəşe, votəşe ki, İslam çe dınyo ən cazibədar din, Əhli-Beyt (ə) məzhəb ən fəal məzhəbe. Tosə ısət dınyoədə hiç qıley din və ya məzhəbi 20 milyon nəfər bə i məkon qırd karde zınə nişe.

Bə Ərbəini zəvvaron xidmətən çe Nəcəf və Kərbəlo şəhəron hokuməti  barzə səviyyədə təşkil kardəşone. Tehron şəhəri xidməti idarə mudiri muavin Muctəba Yəzdani  votəşe ki, de ım şəhəron həmkarəti kardedən, bə Kərbəlo 600 nəfər, bə Nəcəf 400 nəfər xidmətkar ezam kardəşone.

"Nur-az.com" saytən xəbə dodə ki, ımsor bə Ərbəini zəvvaron xidmətədə mande ro 10 həzo nəfər İmom Huseyn (ə) və Həzrəte Əbbas (ə) hərəmon idarədə ğeydiyyato dəvardən. Im idarə rəsmi Riyad Nume Salmani votəşe ki, həmonə xidmətkaron ıştə koon barzə səviyyədə icra kardedən.