Serkisiyan: İron və Ermənıstani miyono həmkariyon hevuj bəbe.

Ermanıstani prezident muxtəlif sahəonədə de İron İslam Respublika əloğəon inkişofi tələbış kardə.

Ermanıstani prezident Serj Serkisiyan İrəvonədə de İroni xarıci vəzir Muhəmməd Cəvad Zərif vindemon karde təsdiğış kardə: lazime bə İron-Ermənıstani miyono kanə mədəniyə əloğəon xotə bəbe çı rabitəon tale mıəyyən bıbu.

Əv əlovəş kardə: bo iğtisodiyə həmkarion hevuj kardeyro hiç mane ni ijən bo İroni zumandətiro Ermənıstan xuxusi əhəmmiyət dodə ijən bədoy.

Serj Serkisiyan İroni ğərbədə bıə bumə larzə nəticəku çı İroni şahrvandon bə rəhmət şe bə İroni millət və dıvlət səbəsəlomətəti ərzış kardə ijən votışe: 2 qılə kişvəri miyono əloğəon bəbe daimən dəvom peydo bıkə.

İroni xarıci vəzir Muhəmməd Cəvad Zərif həm İroni prezidenti vığandə səlomi bə Serj Serkisiyan iblağış kardə ijən İroni ğərbədə bıə bumə larzə bə peştə ijən həmdardi pəyğom vığande xoto bə Ermənıstani prezidenti təşəkkurış kardə.

Zərif Ermənıstani çı İroni çokə hamsuyə kişvər zınəş be ijən əlovəş kardə: mıştərikə kamisiyaon dəvoniye karde bəzne 2 qılə kişvəri miyono bə iğtisodi əloğəon inkişofi komək bıbu.

İroni xarıci vəzir Muhəmməd Cəvad Zərif zinə de qıləy yolə ticari-iğtisodiyə heyəti bə ico bə İrəvon səfərış kardə.

Əv bo 2 tərəfi və məntəğəiyə həmkariyon inkişofiro zinə de Ermənıstani i minə vəzir Karen Karapetiyan iyən xarıci vəzir Edvard Nəlbəndiyan həm vindemonış kardə.