Mısılmoni aləmədə Vəhdətə həftə
Dekabrə manqi 1-minə ruj, de mısılmonə təğvimi rəbiul-əvvəli 12 -ədə bo mısılmonə cəmiyyəti "Vəhdətə həftə" bino bedə. Im həmən mevludi həftəy. Çunki, İslami Peyğəmbər (s.ə.v.s) ım həftədə bə dınyo omə. 1981-minə soriku de İroni İslamə Respublika binonoə, rəhmətinə imom Xomeyni təşəbbusi ım muddət bənə mısılmon umməti vəhdəti har sor ğeyd kardə bedə.
Azərbaycani İslamə Partiya de ım Həftə əlağədar qıley tədbir dəvuniəşe. Partiya sədr əvəzi Hacı İlham Əliyevi sıftənə ehandəyədə tədbiri içtirakəkon de ım idə ruji munasibəti təbrik kardışe, votışe ki, "2 sore hokumət bə çəmə partiya tədbir dəvunie ro vırə dodəni, bı səbəb əmə partiya qərərqahədə məhdud şəkilədə jıqo tədbiron dəvunie məcburiyyətədə mandedəmon." Ey həmən Reyğəmbər (s.ə.v.s) barzə keyfiyyəton barədə qəp jeşe, çey mevludi bə həmə islamə ictimaiyyəti vəhdəti xidmət karde bə tədbiri iştirakəkon nəzə rosnişe. Diqər votemon kardəkəson ğeyd kardışone ki, islami deşmenon interneti imkanonədə çəmə dini çe çəşo eğande ro muxtəlif du, bıhton və şərməndə əməlonku istifadə kardedən. Bə çəvon ım fitnəkarə hərəkəton layiğinə cəvob çəmə vəhdəti həniən zumand kardeyəde.
Dini Etiqad və Vicdanə Azadiyon Mudafiə Mərkəzi (DEVAMM) sədr İlğar İbrahimoğlu, İslami Muğavimət Hərəkati sərdar Revşən Əhmədli, AİP Zənənon Şura sədr Nevrəstə İbrahimova, Azərbaycani Ruşinəfikron İbemoni sədr Eldəniz Ziynalov və həniən diqər odəmon bı tədbirədə iştirak hestşonbe, əvon de "Vəhdətə həftə" munasibəti bə həmə mısılmonon təbrik votışone.
