Zərif: ətomiyə təvafuği barədə ijən muzakirə nibəkamon.

İroni xarıci vəzir ətomiyə təvafuği barədə çı Amerkə prezidenti ziyod tələbion bəpeştə təkidış kardə ki İroni ətomiyə təvafuği barədə ijən muzakirə karde imkonış ni və Amerkə bəbe bəştə əhd-peymonon əməl bıkə.

Bə İrna raporti əsos Muhəmməd Cəvad Zərif zinə şəv qıləy Tuvitədə ğeydış kardə: Trampi siyasət və çəy zinə şəvi bəyoniyə qıləy befoydə cəhde ta qıləy beynəl xalğiyə təvafuği ləğv bıkə və hol ım ki ım təvafuğ çı i bıə milləton təşkilat və ətom enerji beynəl xalğiyə orqani tərəfo təsdiğ bıə.

İroni xarıci vəzir təkidış kardə: ətomiyə tavafuği barədə ijən muzakirə karde əbıni və Amerkə jıqo ğədimiyə tikroriyə sıxənon əvəzi vey çoke ki bənə İron bəştə əhd-məsuliyəton əməl bıkə.

Amerkə prezident Donald Tramp zinə şəv İroni ətomiyə təvafuği çərçivədə bə İroni əleyh sanksiyaon ləğv karde mıddəti ijən muvəğğətən oqətışe əmmo həmzəman çı İroni 14 nəfər rəsmi şəxson iyən çand qılə şirkətonış bə co qılə təhrim siyahi izofəş kardə; Tramp həmçınin ətomiyə təvafuği barədə kanqresədə bo har qılə ğanuni təsdiğ kardero 4 qılə şərti ğeydış kardə.

Əmmo İroni xarıci vəzarətxanə həm qıləy bəyoniyədə təsdiğış kardə: ətomiyə təvafuği dılədə zumandə sistem iyən tədbiron və beynəl xalğiyə umum iştimaiyəti himoyəon bois bıən ki Amerkə prezident, siyonist rejim iyən canqtələbə radikalə kişvəron cəhd ijən məğlub bıbu.

Im bəyoniyədə Amerkə tojə təhdidon məhkum bey bəpeştə ijən təkidış kardə ki ətomiyə təvafuğ qıləy beynəlxalğiyə sənəde ki hiç faxt çəy barədə ijən muzakirə karde imkonış ni.

İroni xarıci vəzarətxanə ijən elanış kardə ki ətomiyə təvafuğ və co mıvzoon miyono hiç rabitəi ni.