AİŞ de İroni nuvə muğaviləku beşe elan kardışe

AİŞ prezident Donald Trampi de İroni Nuvə Muğaviləku beşe bəyon kardışe.

"Maide.az" bə “leader.ir” sayti istinadən xəbə dodə ki, Ali Rəhbər Ayətullah Seyid Əli Xamenei Amerika prezidenti ım bəyanat sıbık, yolə səhv və axməxə qəm hisob kardışe. Votışe ki, bı bəyanatədə İroni xalqi de 10 qılə dıviə muddəa təhdid kardedə, bey rıjd omedə. Rəhbəri AİŞ tərəfo ım muğavilə darışte bevəcə və mırdolə əməl zınəşe.

İİR Prezident Həsən Ruhani bə İbə Ştaton bəştə ehdədarion əməl nıkardə, probleminə devlət nom noşe.

İron İslamə Enğelabi Pasdaron Korpusi sərdar qeneral Əli Cəfəri bəyon kardışe ki, Amerka çe nuvə muğaviləku imtina karde çəvon beetibarəti nişon doşe. İroni xalqi şucaət  çe Amerika təhdidonsən vey jol və əzəmətine.  

De İroni Nuvə Muğavilə həmtərəf devlətonədə Fransa, Almaniya və Yolə Britaniya Xarici Koon vəziron mayə manqi 14-minə ruji de İroni tərəfi ım məsələ barədə vindemon nəzərədə qətə bedə. Həsən Ruhani votəşe ki, İroni tərəf atomi zəngin kardə koon bərpo karde barədə ıştə qərori çand həftə bə təxir eğandedə. Çe Nuvə Muğavilə həmtərəf devləton munasibəti zınə bəpeşt bə ım tədğiğaton rəvoc doe məsələ barədə ğəti ğəror bədomon. 

İMT Sər katib Antoniu Quterreş,  Avropa İttifaği numayəndə Federika Moqerini Amerika ım ğəror tənğid kardəşone. Rusiya və Turkiyə rəsmiyonən bə İroni mevğe tərəfdar beşən.

Bə İroni nuvə tədğiğaton dair Bahəm Fəaliyyətə muğavilə 6 qılə devləton - Almaniya, Fransa, Çin, Rusiya, Yolə Britaniya, AİŞ de İİR arədə dəbastə, 2015-minə sori iyuli 20-ədə İMT Əmniyyətə Şura tərəfo təsdiğ bıə qıley muhummə sənəde. Əyo nəzərədə qətə bedəbe ki, İron ıştə atom tədğiğaton oqətedə, Ğərbi devlətonən bə İroni munasibətədə sanksiyonku dast kəşedən. Əmo 3 sore ki, İroni ıştə atom proqrami oğətəşe, əmo Amerika tərəfi nəinki bəştə səpe peqətə ehdədari icra nıkardışe, ısət hətto həmonə muğaviləku beşe, demiən bə beynəlxalğə normon ıştə behurmətə munasibət numayiş kardışe.