İİR Prezidenti dınyo mısılmonon bə vəhdət dəvət kardışe

Dəvardə çımmə ruji İstanbulədə İslamə Həmkarəti Təşkilati sionistə rejimi bə Fələstin xalqi əleyh cinayətə əməlon həsr bıə fevğəladə iclasədə İİR prezident Həsən Ruhani dınyo mısılmonon bə vəhdət dəvət kardışe. Votışe ki, "qirəm sionistə rejim de vahid umməti dimbədim bımando hiç vaxt ıştə cinayətə əməlon dəvom karde əzıni".

İroni Prezidenti bımi ro çand qılə konkret təklifon bə nav doşe. Ğeyd kardışe ki, bəpe İbə Milləton Təşkilat Amerika ıştə səfarəti ğeyri-ğanuniə tərzədə bə Ğuds ovoştınie, həmən bə sionistə rejimi Fələstinədə cinayəton dair qıley iclas dəunio və  ım məsələ ıştə muşahidədə oqəto.

Çe Amerika devləti ım ğeyri-ğanuniə ğərori tədğiğ karde ro təhlilqərono ibarət ekspertə qrup onoə bıbo.

Bə Fələstini xalqi komək karde, çe Trampi im təxribatiə ğərori vədə mande ro  bə Amerika və sionistə rejimi əleyh siyasi, iğtisadi və ticari qəmon şodoe, de sionistə şirkəton ticarət karde səpe sanksiya noe lozime.

Bə Fələstini xalqi kollektiv koməkəti karde ro bəpe munasib ro və imkanon onoə bıbo.

Sionistə rejimi atomiə silahi bo Ğərbi Asiya məmləkəti qıley yolə xəto bıe, İroni tərəfi ım reqioni çe atomiə təhdidiku təmiz kardə təklif  islami məmləkəton diğğətədə mandənine.

Həmə islamiə devləton ıştə təğvimonədə Rəməzonə manqi orəxnə cımmə bənə "Ğudsi ruji" ğeyd bıkon ki, ım çe dınyo mısılmonə xalqon və azadixahə ğıvvon bə fələstinıjon dastəqi qıley nışonə bıbo.

Prezident Həsən Ruhani həmən votışe ki, Fələstini məsələ çe İroni devləti xariciə siyasəti əsasi təşkil kardedə. Əmo təəssuifinə koe ki, kali mısılmonə devləton  Fələstini zəminon işğal kardə de sionistə rejimi hartərəfinə əlağon etənəşone.