Zərif: Amerkə tojə strateqia veyni ə kişvəri təcridi bois bəbe.

İroni xarıci vəzir votışe: Amerkə xarıci vəziri sıxanonədə bə İroni zidd elan bıə tojə stratejiaon Amerkə kişvəri təcridi bois bəbe.

Ətomiyə təvafuğiku xaric bey barədə Amerkə prezidenti ğəroli elani bəpeştə ım kişvəri xarıci vəzir Mayk Pompeo(May21), de beəsosə ittihamon tikror iyən İroni bə zumandə sanksiyaon təhdid karde bo İroniro 12 qılə şərt əcumlə Urani qəncin əkə təsisoti təətil karde bəyonış kardə.

Bə İrna zinə ruji raporti əsos Muhəmməd Cəvad Zərif İroni islamiyə məclesi milli mənafe və diplomatiyə fraksiyə ozvon iclosədə ətomiyə təvafuği bo İron veyə noeliyət zınəş be və əlovəş kardə: ımruj ətomiyə təvafuğiku Amerkə xarıc bey vasitə, fəğət çı Farsi dıyo məntəğə 3 qılə ərəbi kişvər iyən sionist rejim de ətomiyə təvafuği muxalifin boçi kiaz bovəmandim i qılə beynəl xalğiyə icma ətomiyə təvafuği peştədəy ijən Amerkə prezident Donald Trump bo ım şəroyəti əvəz kardeyro zuş nıbe.

Donald Trump(Mayə 8) de bə İroni zidd beəsosə ittihamon tikror karde, Amerkə  ıştə kişvəri ətomiyə təvafuğiku xaric bey elanış kardə.

İroni xarıci vəzir təsdiğış kardə: bəzi kişvəron himoyədorəti bə İroniku himoyə karde məno ni, bəlkəm bım mənodəy ki əvon de beynəl xalğiyə təvafuğaton darıştə kəson muxalifin.

Zərif bə ım nuktə işorəş kardə ki həmmə kişvəron bəştə mənafe əsos muzakirə bəkan və təsdiğış kardə: əqə Avropa ətomiyə təvafuğədə mandəy və çəyku himoyədorəti kardedə bəştə mənafe xotoe və əqə qarantiaon sayədə İroni mənafe həm təmin bıbu, ətomiyə təvafuğədə bəmande.