Əmir Əbdullahiyan:İron fələstiniku ıştə himoyəon dəvom bədoy.
Beynəlxalğə koonədə ironi islamiyə şura məclisi rəisi məxsusə mışovir zinə əsrə vaxti tehronədə bıə de fələstinı səfir Səlah Əlzəvavi vindımonədə votışe:İron İslam Respublika fələstinıku bəştə himoyəon dəvom bədoy.
Bə Mehr aqentəti xəbon əsosi Huseyn Əmir Əbdullahiyan işarəş karde İron İslam Respublika fələstinı məsələ vədə bə domo nibənışte.
Əlzəvavi həm ım vindımonədə işarəş karde ki fələstinı məsələ bəpe islamiyə omməti koon əvələdə ğəror bıqəto və votışe:Amerkə president Donald Tramp beynəlxalğə siyanizmi iradə icra əkəy.
tehronədə bıə fələstinı səfir "Əsri ticarət" nomo bə amerkəvıjon plani işarəş karde və ıştə sıxanon dəvomədə əlavəş karde fələstinı rəhbəron və millət de ım plan muxalifin.
Əlzəvavi votışe: trampı hərəkət şərifə ğudsi bənə sionist rejimi paytəxt bə rəsmiyət zıneyu ğudsı tarix və islamədə çəy erj və bəpeə vırəku nodonəti iyən axməxətiku iborətış zınə.
"Əsri ticarət" nomo Amerkə devləti tərəfo tojə plane ki fələstinı milləti həxi arəku barde domoədən votə bedə ım plan bəzi ərəbiyə məmləkəton roziətiədə hozzı bə.
"Əsri ticarət" nomo bə amerkaiyə plani əsosi Şərifə Ğuds bə sionist rejim doə bəbe ,coqlə məmləkətonədə bə fələstinıjə avərəon oqarde həxışon ni və Fələstin fəğət İordan Ru ğərbiyə sahilədə mandə ərazi iyən ğəzzəku iborəte.
Bə "Əsri ticarət" ya əsri ğəroli nomo bə plani əsosi Tramp 2017 minnə sori dekabri 6 nə ruji ğudsı işğal bə şəhrış bənə israili ğeyre ğanoniyə rejimi paytəxt elanış karde və telaviviku bə şərifə Ğuds Amerkə səforətxonə ovıştıneyu ıştə ğəroliku işarəş karde.
Amerkə devlət 2018 minnə sori mayə manqi 14 minnə ruji ım ğərolış bə nəticə rusni.
ğudsı şəhr ki mıslmonon 1 minnə ğiblə Ələğsa məçit bəvədəy fələstinı co nıbə ərazi və islami 3 qılə mığədəsə vıranku qıleniy.
Ğuds 1967 nə soriku sionist rejimi işğalədəy.
