Ruhani: Trump bəpe de şiri dum hənək nıkə, İroni reaksiya peşmonəkəy.

İroni prezident bə ım nuktə işorəş karde ki İron çı təcavuzi əhl ni və mudafiə ğudrəti dumoədəy və təkidış karde: İron de hiç kəs dave və canqi bino karde dılış ni əmmo dışmən bəpe çok oğo bıbu ki de İron canq karde çı həmmə canqon ınə və de İron sulh karde çı həmmə sulhon inəy.

Həsən Ruhani zinə xarıcədə bıə İroni nımoyəndətion rəison iclosədə İroni nati sadir nıkarde icozə barədə çı Amerkə rəsmi şəxson tojə iddion reaksiyadə votışe: Amerkə prezident oğo bıbu ki İron tole- tarixədə məntəğə dıyo əvon əmniyyəti təminış karde və Trump bəpe de şiri dum hənk kardeku bə kəno be mande və boçi ki İroni cəvob və reaksiyaon vey pəşimonəkəy.

İroni prezident bə Amerkə siyasətmədoron rasist və ireğçiyə siyasəton işorəş karde və votışe: ımruj Amerkə dıvlət ojə oşko çı mısılmonon abro-həyo poymol kardedə və bə şərifə Ğudsi be ehtıromti karde iyən i qılə təcavuzkor və işğal əkə rejimi xoş omə ro de i milyard və 5 sa milyon mısılmon canq karde məğsədi elan kardedə.

Ruhani çı sionist rejimi əsosış təcavuz, işğal, xəyonət, jenon, hırdənon və be pənohə odəmon kıştə və avarə karde zınəş be və votışe: detosə bə ısət hiç faxt Amerkə və sionist rejim jıqo ojə-oşko Fələstin dıvləti rəsmion nızınə və ya xot şərifə Ğudsi bə mısılmonon aid nı bey barədə etırof kardə nıbin.

İroni prezident ijən votışe: İron hejo de ərəb və Fələstin hamsoyə bıə kişvəron muzakirə karde cərəyonədə votışe be ki sionist rejim çı istidlol və məntıği əhl ni və de icloson dəvoniyə ım sərzəmini ozod karde və Fələstinə avarəon oqordoniyə imkonış ni əmmo ımruj həmmə kəson ım həğiğəti dəştə çəşi vindedən.

Ruhani bə İroni vədə Amerkə dıvrə 40 sori mıddətədə məğlubiyəton və planon əməli nı bey işorəş karde və votışe: dınyo və məntəğədə İroni nıfuz bə tojə soron aid və məhdud ni bəlkəm ımruj İroni nığlə stratejikə nıfuz, şərğiku detosə Hindi Nimə Ğarə və ğərbiku detosə miyonə dıyo, Cənubədə detosə Hindıstoni Okyan və Sıə Dıyo və şimalədə detos mərkəzi Asiya və Ğəfğazədə heste və moşahidə bıdə.

Ruhani ijən təsdiğış karde: Suriyə, İrağ və Livanədə İron bəştə fəaliyəton fəxr kardedə və detosə oxo ki fəxr kardedə ijən hiç faxt ım sahədə və terrorizm mubarizə barədə xoto deşmənonku icozə ni bəstəne.

Ruhani İron və dınyo muxtəlifə kişvəron miyono çokə əloğəon icod karde tələbış karde və votışe: İron de hamsoyə kişvəron dostanə həmkarion fikədəy və tojə dıvrədə de Ərəbiston, İ Biə Ərəbon və Bəhreyn rabitəon isloh karde ğəsdımone.