İron və Çini miyono əloğəon inkişof.
İroni İslamiyə Şura məclesi rəis Əli Laricani de Çini parlemanti sədr vindemon karde bə 2 qılə kişvəri miyono dustanə əloğəon işorəş ka və votışe: muxtəlif baxşonədə de Çin əloğəon hevoj bəbe.
Əli Laricani bə Çin səfər karde hədəfi 2 qılə kişvəri miyono əloğəon inkişof doe zınəş be və təkidış karde: İron bo har curnə əloğəon hozzoətiş heste.
Çini parlemanti sədr Li Jan Şo həm ım vindemonədə votışe: İron və Çini miyono 2 həzo sornə əloğəon cərəyonədə hiç faxt ixtilof ya davo moşahidə bıdə ni.
Əv əlovəş karde: Çini prezidenti səfər bə İron 2 qılə kişvəri əloğəonədə muhimə mərhələ be ki imzo bıə muğaviləon bo dıroz mıddətə əloğəonro strateqiyaon əlomətdore.
Əli Laricani ijən zinə de Çin və İroni dustiyəti parlemantiyə qrupi yol Li Şoe Yonq vindemon karde bo İron və Çini miyono əloğəon dılədə bıhran icod kardero deşmənon xəbisə planon be əsər zınəş be.
Laricani ımruj həm Çini Renmin unniversitti ostadon və tələbəon cəmədə dınyoədə həmmə terroristiyə qrupon peştədə çı Amerkə siyasəton dəvom kardeku xəbəş do və votışe: Suriyə və İrağədə de terroristiyə qrupon mubarizə barədə cərəyonədə İroni huzur de çəvon dıvləton rəsmi dəvəti əncom bıə.
Çini xarıci vəzarətxonə sıxənəvot həm tojədən bə İron və Çini miyono əloğəon inkişof işorəş karde və votışe: ətomiyə sazış bəpe komil iyən təsirin icra bıbu.
