İron və İraği miyono əloğəon inkişof; prezident Ruhani bə İrağ varid be.

İroni prezident de ali iğtisodi-siyasi heyəti bə i co ımruj sıb bə İrağ varid be.

Im səfər de İraği prezident Bərhəm Saleh iyən i minə vəzir Adel Əbdoul Məhdi rəsmi dəvəti əncom bıə.

İraği sulh prezidentəti Sarayədə rəsmi pişuz mərasemi bəpeştə, İron və İraği rəsmi şəxson miyono muğaviləon imzo karde iyən muzakirəon bino bəbe.

Prezident Ruhani ım səfəri bənav bə Amerkə prezident Donald Trampi məxfiyə səfər bə İraği işorəş karde iyən votışe: İron və İraği miyono əloğəon bənə Amerkə işğaləkə kişvər ni.

Əv bə məntəğədə Amerkə xar-zəlil bey təkid iyən əlovəş karde: İrağ iyən Suriyədə Amerkə cinoyəton hiç vaxt yod və be karde ni bəbe.

İroni prezident bə 2 qılə kişvəri miyono bənə bıvə bıə əloğəon işorəş karde iyən votışe: ım səfər hokmən İron və İraği milləti mənafe çərçivədə bəbe.

Əv iğtisad, sənaye, riks xəton, ditəsərrofat iyən ekoloqiya, səhiyyə və dəvo-damon, tranzit, torizm və məntəğə əmniyyəti barədə bə 2 qılə kişvəri miyono əloğəon mehvər və zəminə işorəş karde ki səfərədə çəvon barədə sohbət bəbe.

Zinə İroni dıvlət kabinet iclosədə həm har qılə vəzarətxonə de İrağ əloğəon inkişof doe xoto ıştə vəzarətxonə zərfiyyəton barədə mətləbon bəyonışon karde ta ım muhimmə səfərədə çəvon barədə sohbət bıbu.