Ruhani bə İron iyən İraği milləton miyono mədəni və eteğadi i bemon təkidış karde; İron və İraği əloğəon barədə mıştərəkə bəyoniyə.
İroni prezident Kərbəloədə məzhəbi lideron, eltiyaon və kuçəkə toyfəon yolon cəmədə bə İron iyən İraği milləti miyono mədəni və eteğadi cəhəto bıə vəhdət işorəş karde ki əvoni co karde imkonış ni.
Bə İrib raporti əsos Həsən Ruhani çı İraği milləti bo Əeiməye Əthar(ə) zairon ğəbul kardero xusosi Ərbəinədə çokə cəmaət və mizban zınəş be və votışe: İroni millət Kərbəlo sərzəmini çı cəhod, şəhodət, isar iyən bəfo sərzəmin hisob kardedən.
İroni prezidenti bə İrağ səfər karde 3 minə rujədə 2 qılə kişvər qıləy mıştərəkə bəyoniyə vasitə ım səfəri çı İron və iraği miyono əloğəon nığıləti nışonə ğeydışon karde və əvışon bo dıroz mıddət həmkarionro stratejik səfər zınəydən.
İrağ ım bəyoniyədə de terrorizm mubarizə barədə cərəyonədə iyən İrağ komək karde xoto İronış i minə kişvər hisobış karde və ıştə ğədrdonti elanış ka.
İron həm bə çəy xoto ki İrağ anti İron sanksiyaonədə de İroni deşmənon bə i co bə ni çı İrağiku təşəkorış karde.
Bəyoniyədə bə elmi, texnoloqiya, təhğiğ, nat, ticarət, səhiyyə, nəğliyot, osonəro, sərmoyənoə, viza rejimi hoston karde, tojə sərhəd terminalon okarde, mıştərəkə sənaye mərkəzon soxte, turizm, ekoloqiya iyən sərhəddiyə problemon həl karde həm təkid be.
İroni prezident ki 3 ruj çımiku bənav bə İrağ səfərış karde, detosə de İraği prezident, İraği i minə vəzir və məclesi sədr videmon iyən muxtəlif mıvzoon barədə muzakirəş karde.
Həsən Ruhani zinə həm bə Nəcəfe-Əşrəf şə iyən İmom Əli(ə) pokə hərəmi ziyorət karde bəpeştə de ali ruhanion əcumlə yolə mərcəe təğlid Ayətullah Sistani vindemonış ka.
