İnğilabi yolə rəhbər:Fələstinı millətiku mudafiyə insoni və diniyə cəhətonış heste.

İslami inğilabi yolə rəhbəri 3 şanbə əsrə vaxti ali məktəbon ostadon və elmiyə heyəton çandə həzo uzvi vindımonədə votışe:Fələstinı millətiku mudafiyə karde həm insoniyə cəhətış heste, həm dini və şəriyə cəhəton və əlavəş karde bəzi tərəfon ki Amerkə domoədə hərəkət kardən "əsri muğavilə" nomo bıə plani bə vırə eğande domoədə hestin əmmo Amerkə və çəy domoədə bəkəson ım məsələdə de məğlubiyət dim bə dim bəben.

Bə yolə rəhbəri məlumat ərosnə mərkəzi elanon əsosi Həzrət Ayətullah Xamenei ımsornə sori Ğuds rujış dəvardə sorisə muhimmış zınə və votışe:ım veyə əhəmmiyyəti dəlil Amerkə və məntəğədə çəy domoədə hərəkət kardəkəson xəyanətkarə hərəkəton əsri muğavilə nomo bıə plani bə vırə eğandeyuy.

İslami inğilabi yolə rəhbəri Fələstinı məsələdə ısətnə şərayeti fərğış dəvardə rujonədə Amerkə və çəy domoədə bə kəson ədəbiyot və oşkoə sıxanonədə Fələstinı mevzo bə kəno noeədə zınəşe və əlavəş karde boçimi əsosi Ğuds ruji aksiya ki milləti huzurədə fələstinıku mudafiyə kardeye,ımsor veyə əhəmmiyyətış heste.

Həzrət Ayətullah Xamenei ıştə sıxanon co baxşədə,muzakirə həxədə xariciyə mediyaon ğalməğal rost karde barədə işarəş karde və votışe:çəvon məğsəd çı sıxanonku ki votedən İron bəpe bə muzakirə oqardo,de Amerkə muzakirəku sıxan şedə,çonki əmə coqlə məmləkətonədə problemımon ni və de Avropavıjon və co tərəfon muzakirə kardəmon.

İslami inğilabi yolə rəhbəri votışe: muzakironədə əsosə məsələ muzakirə mevzo təin kardeye və əlavəş karde əmə ha mevzo barədə muzakirə nibəkamon və inğilabi nomos və əsosə məsəlon iyən məmləkəti mudafiyə zu muzakirə mevzo ğəror doy əbı ni.

Həzrət Ayətullah Xamenei tojədən işarəş  karde İron İslam Respublika mıtləğən de Amerkə muzakirə nibəkay və əlavəş karde jəqo ki nako həm votə bə de Amerkə muzakirə nıkarde boçimi xotoy ki əvələn heç qılə foydəş ni və saniyən zərərış həm heste.

İslami inğilabi yolə rəhbəri Amerkə bə İroni zid təziğon həxədə həm işarəş karde və votışe: İron İslam Respublika Amerkə təziğon vədə lozim bə təziğ nışon doeyu roonış extiyorədə heste.

İslami inğilabi yolə rəhbəri eyne holədə İroni elmiyə inkişafış bə istimarçi iyən sultəqərə ğıvvon niqəranəti boisış zınə və əlavəş karde məmləkəti elmiyə inkişafi surət çəmə idda ni bəlkə dınyoədə bə elmi ğeymət doə mərkəzon elanışon kardə ki İroni elmiyə inkişafi surət dınyo miyonə hisobiku 13 kərə bəpeye və bəzi elmonədə İron dınyo barzə səviyədə ğərorış qətə.