Ruhani:İron heç vaxti təziğon vədə bə çərçivə enibəqıne.

İron İslam Respublika prezdenti votışe:atom sazışiku Amerkə xaric be məmləkəton əlağə iyən məntəğə əmniyyətdə ğəyr əz mənfiyə təsiron coqlə nəticəş bə ni və əlavəş karde İron heç vaxti təziğonədə bə çərçivə enibəqıne.

Prezdent Ruhani Tehronədə de Almaniya xarici koon vəziri vindımonədə votışe: məntəğə əmniyyət heç vaxti  təziğon iyən bə İroni milləti zid sank siyaonədə bə dast nibome və əlavəş karde Amerkə bə İroni zid dıştə zılminə sank siyaon ixtisadiyə terarizmi roədə hərəkət kardə,boçimi əsos İron ə kəson vədə ki dəmon və xurəkış milləti vədə bastəşone ,mığavimət bəkay.

Prezdent Ruhani bə Avropa 3 qılə məmləkət(İnqiltərə,Almaniya və Fransə) yolon oşkoə vədəon dəvardə 1 sori mıddətdə bəştə  vədəon əməl karde və atom sazışiku Amerkə xaric be  cobran kardeyu  bıə fəaliyyəton təin bə vaxtədə işarəş karde və votışe:əqər avropaiyə məmləkəton bovəşon heste ki atom sazış bə İron və Avropa itifaği əlağon nəfe iyən bə məntəğə sulh,oroməti, və əmniyyət bois bedə bəpe təcili çəy hifz kardeyu cəhd bıkə və əməli iyən ciddiyə hərəkəton əncom bıdə.

İron İslam Respublika prezdent ım idda bəyon karde ki İron atom silah soxte domoədəy na səhihış zınə və votışe:beynəlxalğ atom enerji moəssisə 15 qılə hozzı kardə bə məlumat və çəysə muhim islami inğilabi yolə rəhbəri fətva atom silah soxte hərom zıne cəhətdə nışon dodə ki ım idda səhih ni.

Almaniya xarici koon vəzir həm ım vindımonədə atom sazışiku 1 tərəfə sorətədə Amerkə xaric beş səhvə hərəkət zınə və votışe: Almaniya,Amerkə bə İroni zid siyasətdə veyə ixtilofış heste və cəhd kardə ta de Avropa coqlə məmləkəton həmkarəti məxsosən Fransə və İnqiltərə atom sazışi hifz bıkə və ıştə doə bə vədəon bə nəticə bırosno.

Almaniya xarici koon vəziri votışe:əqər kəsi de İroni tarix oşno bıbo ve çok bəzne ki bə İroni milləti zid veyə  təziğ nışon doe strateji heç vaxti bə nəticə nibərəse.