Ruhani: Amerkə siyasəton məntəğə və dınyo stabileti təhdidəkəy.

İroni prezident votışe: Amerkə de iğtisodi, maliyə və hərbi zərfiyət iyən de təcavuz siyasəti məntəğə və dınyo stabileti təhdidəkəy.

Həsən Ruhani Ğerğizıstoni paytəxt Bişkekədə bıə Şanhay əloğəon təşkilati iclosədə əlovəş karde: radikalizm, i tərəfə siyasəton iyən məntəğəku xaric bıə kişvəron co məmlekəton koonədə mudaxilə karde dınyoədə anədə təhdidon icodış karde ki karde bəzne həmmə kişvəron stabiləti, əmniyyət və mənafe məhv bıkə.

Ruhani bə İrağ və Suriyədə İroni de İŞİD terrorçiyə qrupi mubarizəon səbarzəti işorəş karde və votışe: İrağ və Suriyədə İron sulhi xoto canqış karde, Əfğanıstonədə radikalizmi məhv karde xoto de İ Bıə Milləton təşkilati həmkari kardedə və ısət Yəmənədə sulhi bərpo karde xoto kəmək bəkay.

Əv bə de hamsoyə kişvəron məntəğə və 2 tərəfiyə votımononku İroni meyl işorəş karde və votışe: i tərəfə siyasəton çok ni, boçi ki terrorizm, radikalizm və de ğaçağ mubarizə barədə çand tərəfə siyasəton zəruriyati təsdiğ kardedə.

İroni prezident ətomiyə sazışi qıləy çand tərəfə muhimmə diplomatikə nəticə zınəş be və təkidış karde: de diğğət bə İroni ehdemonon kamilən icra bey barədə ətom enerji beynəl xalğ təşkilati 15 qılə raporton, ım sazışiku Amerkə xaric bey və co mande kişvəron mıəyyən bıə ğərolon, İron pidəşe ki rə İroni iğtisadi mənafe təmin bıbu.

Şanhay həmkari 19-nə iclos zinə Ğerğizıstoni paytəxt Bişkekədə bino bıə.