Fransa bə Amerika – İroni arədə munağişə şiddətin karde əleyhe.
AİŞ bə İİR əleyh ıştə təcavuzkarə niyyətonku dast kəşedəni. Bə iyuni 21 ovaştə şəvi çəvon bepilotinə ıştənpər de kəşfiyyat barde məğsədi bə İroni həvo ərazi dəfırsie. İroni mudafiə ğıvvon Hormuzqan vilayətədə həmonə bepilotə aparat jəşone, eğandəşone saru.
“Faktxəbər.com” bə “Tasnim Nevvs Agency” portali əsasən çe İslamə İnğilabi Pasdaron Korpusi Hərbi Həvo Ğıvvon komandan ƏmirƏli Hacızadə Amerika bepilotə droni qulu karde barədə votəyon bə əhandon nəzə rosniəşe. Hacızadə votəşe ki, ım droni dumo Amerika qıley P8 patrulə həvopeyman İroni həvo marzon darıştəşbe. Çey salonədə 35 nəfəro ibarət hərbiə heyət hestbe, əmo əmə əvmon nıjəne. Droni jeku 10 dəğiğə bə nav bəvon xəbərdarəti vığandımone. De ım bepilotə iştənpəri je əmə bə Amerika çəvnavi domone.
Amerika tərəf isə sıftə çey droni sərnequn bıe xəbə təkzib, çəyo məcburən etiraf kardışe. Prezident Trampiən bə curə hərəkət kardışe, sıftə bə İroni həmlə karde əmr doşe, çəyo ım əmr bə dumo peqətışe.
Fransa prezident Emannuel Makron ım fakti şərh kardeədə ğeyd kardışe ki, “xəlice-Fars məntəğədə hərbiə munağişə bə hiç tərəfi foydə nibədo. Əmə ıştə dasto omə har koy bəkardemon ki, vəziyyəti amoxt bıkəmon. Az tərəfon bə təmkin nişon doe dəvət kardedəm”.
Rusiya XK vəziri muavin Serqey Ryabkoviən votəşe ki, Rusiya-Amerika munasibəton çe “sardonə muharibə” devrisən bə bevəcə hədd rəsə, ısət Moskva de Vaşinqtoni arədə munasibəton ıştə tarixi ən jinə səviyyədəy.
Jıqo vəziyyətədə İroni tərəf ıştə ədalətinə mevğeku bə dumo okıridəni, əzminə siyasət numayiş kardedə. İroni Musəlləhə Ğıvvon Sər Ğərarqahi rəis qeneral-mayor Məhəmməd Bağıri bəyon kardəşe ki, İron de Hormuz tanqəy nat ixrac karde imkanədə bəbebu, co keşvəronən bə jıqo imkani malik bəben. Əks halədə qirəm İron ım tanqəy dəbaste fikrış bıbo, ımi oşko elan bəkarde və bə jimon dəbəvunie.
Ironi Atom Komitə sədr Muctəba Zolnur`iən elan kardəşe ki, qirəm bə İroni nuvə proqrami dair Fəaliyyət proqramədə iştirak kardə devləton nuvə sazişi oğəte ro lazıminə qəmon şo nıdon, jəqo əmə çe Nuvə Silahi pevolo nıkardə muğaviləku beşe imkani nəzəro dəbəvuniemon
