İroni de Avrasiya İbemoni əlağon inkişaf kardedə
Dəvardə rujonədə “Faktxəbər.com”i bə RİA “Novosti” istinadən məlumat doşe ki, İroni parlamenti de Avrasiya İğtisadiə İbemoni Ozodə Ticari Zona barədə muvəğğətiə saziş ratifikasiya kardəşe. Im saziş bo 3 sornə muddəti nəzərədə qətə bıə.
Çey şərtonədə qıleyən ıme ki, tərəfon 1 sori muddətədə bə ozodə ticarəti aid dırıstə roziəti ətrofədə molağaton bəpe bino bıkardon. Im muğavilə vəomə soronədə tərəfon arədə ticari əlağəon xeyli ğoym, həmən hevuj karde nəzərədə qətedə. Çe Rusiya Enerqetika vəzir Aleksandr Novaki ğeyd kardəşe ki, Avrasiya İttifaği de İroni arədə ozodə ticari zona onoe, imkan dodə ki, İronən bə Rusiya QLONASS peyk naviqasiya sistemi umjən bıqıno. Ey əlavə kardəşe ki, Rusiya tərəfi bə Tehroni ım təklif vığandəşe. Novaki çe İroni de Rusiya hokuməton iğtisadi və ticari həmkarəti dair İsfahanədə dəvardə 15-minə iclasədə həmən təklif kardəşe ki, İron – Azərbaycan – Rusiya arədə osonəro xətti okırniə layihə icra bıbo. Bımi ro ım 3 qılə devləti numayəndon didori dəvunie çəş kardə bedə. Vəziri həmən əlavə kardəşe ki, Rusiya və İroni şirkəton Kaspi dıyoədə nat – ğazə mədənon bahəm istismar karde layihəonən muzakirə predmetonin.
“İslamazəri” saytən xəbə dodə ki, Bokuku bə Məşhəd muntəzəmə sərnişin kırniə marşruti oj karde barədə ğəror ğəbul bıə. Bı barədə Bokuədə Az.R de İroni numayəndon ardə dəvardə iclasədə tərəfon roziyəti bə dast vardəşone.
Azad İslam Universiteti rektor Əli Əkbər Vilayətiən votəşe ki, haliyədə ım universiteti Əfğanıston, Ərəbiə Əmirat və Livanədə filialon fəaliyyətədən. Suriya, İrağ və Az.R-ədən ım təhsilə muəssisə filialon oj karde nəzərədə qətə bıə.
