Pars Today

IIR bədxahon çey mustəğilə siyasəti və muvəffəğiyyətinə inkişafi vəy se ro həmişə İroni atomiə proqrami vonə vardedən ki, quya əv atomiə silah soxte pidəşe. 2015-minə sori dınyo 6 qılə devləti – Amerika, Çin, Rusiya, Fransa, Britaniya və Almaniya de İroni muğavilə dəbastişone ki, İron ıştə atomi qəncin kardə proqrami məhdud bəkarde.

Əmo Amerika bəştə ım doə sıxani sadiğ nımande, 2018-minə sori mayə manqiku həmonə muğaviləku beşe. Çe Amerika ım ıştənbəsə hərəkətiku bə peş i sorisən vey muddətədə İron bə həmonə muğavilə  sədağət numayiş kardışe, əmo Amerika ıştə təcavizkarə və təxribatiə hərəkətiku dast nıkəşışe, nəiinki bə İslamə Respublika, hətto dey ticarət kardə məmləkət və şirkəton səpeyən bino kardışe sanksiya noe. Trampi Adminstrasiya ısətən iddio kardedə ki, quya İron atomiə silah soxte pidəşe. İİR Xariciə Koon vəzir Məhəmməd Cavad Zərif bə BBC televiziya musahibədə ım bədxahon pevolo kardə şaiə təkzib kardəşe, votəşe ki, qirəm İroni atomə silah soxte piəşbe, ısət vey vaxtbe ki, həmonə silahış hozo kardəbe. Əmo əmə ımi kardedənimon bə səbəb ki, atomə bomba çəmə əmniyyəti təmin karde nibəzne.

 Bə avropavojon siyasəti dair Zərif`i ğeyd kardəşe ki, əqər çəvon Nezə Şərğədə beatomə şərait onoe məram hesteşonebu, jəqo bəpe bə İsraili nəzər səğandon, çunki ey minimum 200 qılə atomə nuvə hərbiə tıklə hestışe.

Çe Amerika de İroni canqi mumkunati barədə zərifi votəşe ki, Trampi muharibəş pidəni, əmo çey adminstrasiyadə odəmon hestin ki, bo canqi bino bıe ro sınov şedən, bə muharibə tərəfdarin.

MAQATE Vyanadə dəvardə muşavirədə İroni atomə proqrami monitorinqi məsələ muzakirə bıə. Bı tədbirədə iştirak kardə devləton çe Amerika itərəfinə hərəkəton tənğid kardəşone və bey dastək doəşon ni. Məxsusi ğeyd karde vacibe ki, Vyana muşavirə de Amerika təşəbbusi vanqşon kardəbe, əmo ım tədbir bə çey izolyasiya səbəb bıe.