Avroasiya İğtisadi İttifaği de İroni həmkarəti əlağon zumand bedə.
Nezə vaxtonədə Avroasiya İğtisadi İttifaği (Aİİ), ki Rusiya, Belorusiya, Ğəzəxıston, Erməniston və Ğırğızıston devləton daxilin, çəvon de İroni arədə Azad İğtisadiə Zona rejim bərğəror bəbe.
Bı barədə saziş ım devləton parlamenton təsdığ kardəşone. İyuni 10-minə ruji İİR parlament- İslamiə Şura Məclisiən həmonə sənəd ratifikasiya kardə bəpeş 60 ruji muddətədə ım rejimi soxte prosedur məsəlon bə orəx rəsənin və ım devləton de İroni arədə Azadə İğtisadiə Zona fəaliyyət bino bənine. Aİİ iğtisadiyyat komissiya sədr Tiqran Sarkisyani ım ideya jiqo izah kardəşe ki, tərəfon de İroni ticarətədə çe kemrikə verqiku azad bıə, və ya ım verqi saru eğandə molon siyahi barədə roziyəti bə dast vardəşone, ım şərton bo har devləti foydəmande, tərəfon arədə əmtəə devriyyə xeyli ziyod bəkarde. Hərçənd ki, Avrasiya İttifaği 5 qlıə devləti de İroni tiçarət çe İslamə Respublika umumi ticarəti cəmi 2%-i təşkil kardedəbe, və sori 1 milyard nim dollarisən dəvardedənıbe. Isət Amerika İroni təcrid kardə siyasət bardə şəraitədə dey iğtisadi-ticari munasibəton, həm 2 tərəfə, həmən veytərəfə istiğamətədə imkişafi ro vərzinə prespektivon oj bedən. Eyən vote lozime ki, İroni de Cini xarici ticarəti həcm sori 40 milyard, de Avropa İttifaği məmləkəton 13 milyard dollare.
Çe Rusiya İİR-ədə səfir Levon Caqaryani bəyon kardəşe ki, AİŞ bə İroni əleyh elan kardə sanksiyon bə Moskva de Tehroni munasibəton hiç qıley təsir nişon doe nibəzne. Bı barədə “İran.ru” İnformasiya Aqentiyyət bə Fars Nevvs-i istinadən xəbə doəşe. Səfiri həmən votəşe ki, İron və Rusiya mədəniyyət, turizm, iğtisadiyyat, nəğliyyat və di təsərrufati sahonədə həmkarəti dəvom bəkarden. Ey nezə vaxtonədə çe Rusiya yolə şəhəron qıleyədə ım 2 qılə devləton dıjdə universiteton rəhbəron sammiti dəvunie xəbən bə cəmiyyəti edaştəşe.
