Ərbəin Huseyni səhiyyə və damon kamissiya mıştərəkə iclos.

Bə Ərbəin Huseyni zairon səhiyyə və damon xidməton rosniye xoto Tehronədə İron və hamsoyə kişvəron səfiron miyono qıləy mıştərəkə iclos bərpo be.

İroni urrjanstəşkilati rəis Huseyn Kolivənd ım iclosədə İroni Ərbəin ğərorqoədə səhiyyə və təbib xidməton barədə koon iyən tədbiron bəyon karde bəpeştə təkidış karde ki Ərbəin Huseyni mərasimon əyyamədə təbib, səhiyyə iyən damon sahədə xidməton dəğiğ və keyfiyətin  bə zairon doe bəbe.

Kolivənd bə İron və İraği səhiyyə rəsmi şəxson miyono imza bıə muğaviləon işorə və əlovəş karde: hədəf və yolə vəzifə ıme ki be pol bə Ərbəin Huseyni zairon çokə xidməton edaştə bıbu.

Xəbə ome Pakistanıjə zairon bə İron varid bey qəde qəde bino bıdə; 5 həzo çı İroni Sistan və Bəloçıstan ostani xadimon ıştəni bə Pakistanıjə Ərbəin zairon xidmət rosniye xoto hozzo kardəşone.

Oktiyabrə manqi 19, Səfərə manqi 20, şiəyon 3-nə İmom Huseyn(ə) və çəy bəfodorə yaron şəhodəti Ərbəine; har sor çand milyon zair ım mərasimədə iştirok kard xoto bə Kərbəlo səfər bəkan.

Dəvardə sor təğribən 14 milyon nəfər Ərbəin Huseyni şimonədə iştirok kardışone.