İroni de Avroasiya İqtisadiə İttifaği arədə azad ticari əlağəon bino bıe.

Bə İron İslamə Respublika de Avroasiya İğtisadiə İttifaği arədə muğavilə şərton əsasən oktyabrə manqi 27-minə rujiku İroni de həmonə İttifaği devləton miyono azad ticarət bino bıə. İroni tərəf de ıştə 502 nomədə moli de əvon azad surətdə ticarət karde imkanədə bəbe.

Nezə vaxtonədə çe Rusiya Volqoqrad şəhəri ticarətə palatadə çe Mazandarani Ticarətə Kə oj bəbe. Bı barədə bə İRNA Mazandaran ostani qubernatori muavin Həsən Xeyrianpur`i votəşe. Imsori mayə manqədə Volqoqradi numayəndə heyət bə Mazandaran səfər kardəşbe, hartərəfinə həmkarəti barədə de ostani rəhbəriyyəti bə roziyəti oməbe. Isət həmonə proqrqmi cərçivədə Volqoqrad vilayəti de Mazandaran ostani arədə hartərəfinə rabitəon inkişaf karde ro jıqo prespektivon bə meydon beşedə.

Minsk şəhərədə Mustəğilə Devləton İbemoni və Baltikətrofi devləton Osonə Ro Nəğliyyati Şura 71-minə iclas dəvardə. Həmonə iclasədə İroni Devlətə osonə roon idarə sər direktor Səid Rəsuliən iştirak kardəşe. İron İslamə Respublika bı məclisədə bə Həmonə Şura tamhuğuğinə uzv vıjniə bıə. Im Şura 1992-minə sori təsis kardəşone. Sıvoy postsovetə devləton bənə assosiativə uzvon Finlandiya, Turkiyə və Monğolıstoniən əyo iştirakşon heste. İroni bə ım Şura daxil bıe Bəndər-Abbas və Çabahar limanonku ticari molon de 7200 kilometr dırozi osınə roy vasitə dee bə Helsinki kırnie inkan bədo.

Bə “İslamazəri.com” sayti doə xəbə istinadən çe Az.R Masəlu məntəğəku tosə İroni Ostoro şəhəri 68 kilometrinə tojə elektrikə xətt inşa kardedən. Layihə bə istifadə doə bə peş ım dıqlə məmləkəton arədə bərğə enerji sahədə mubadiləon bə həniən barzə səviyyə bərəse. Jıqo qıley xətti həmən çe Az.R Yalama məntəğəku bə Rusiya Dərbənd şəhəri okırnie nəzərədə qətə bedə ki, ımən İron-Az.R– Rusiya arədə vahid elektrikə şəbəkə onoe ro barzə imkanon bə miyon bəvarde.