Ruhani: Amerkə anti İron sanksiyaon bo hiç kəsiro nəticəş ni.

İroni prezident votışe: ətomiyə sazışiku Amerkə ğeyri ğanuni xaric bey nə bo Amerkə və nə bo ətomiyə muğavilə co tərəfonro foydəş nıbe iyən nışoş do ki sanksiya nəticə fəğət həmmə tərəfon dəboxte və məğlubiyəti boyis bəbe.

Həsən Ruhani ki bə Yaponiya səfərış kardə be zinə de ım kişvəri i minə vəzir Abe Şinzo vindemon və muzakirə karde cərəyonədə həmmə kişvəron bə əmniyyət şura ğətnomə əməl karde qıləy lozimə ko bə hisobış varde və votışe: sahədə fəalə Amerkə anti İron sanksiyaon bənə iğtisodi terrorizme ki anti terrorizm kişvəron bəpe çəy vədə bemandon mane bıbun.

Ruhani bə ım nuktə işorəş karde ki İron, ətomiyə muğavilə oqəte çərçivədə ıştə mənafe xoto harcurnə tədbiron əncom bədoy iyən ım sazişədə bemande və bəştə ehdəmonon əməl kardedə.

Əv votışe: Avropa və Amerkə nohəxə siyasəton bəpeştə İron həm bə ətomiyə sazışi maddon əsos ıştə ehdəmonon kam kardedə.

İroni prezident təsdiğış karde: Tehron həmişə məntəğə və dınyoədə sulhi təmin və himoyəkə be və de məntəğə və hamsoyə kişvəron bə i co ım çərçivədə fəaliyət kardedə.

Im vindemonədə Abe Şinzo həm bə İron və Yaponiya miyono bıə 90 sornə əloğəon işorəş karde və bə 2 qılə kişvəri rəsmi şəxson miyono vindemonon əhəmiyyəti təkid kardışe.

Yaponiya i minə vəzir Tehron-Tokiyo miyono həmmə baxşonədə həmkari və əloğəon inkişofi zərruriyati təsdiğış karde.