İronədə bıə Koranavirusiku oxonə xəbon.

İroni səhiyyə vəzarətxonə muavin votışe: dəvardə 24 saəti mıddətədə de təəsufi 297 nəfər Koronavirusi mıbtəlo bıə noxəşon İronədə ıştə coni dastiku doəşone.

Bə İrib raporti əsos Simasadat Lari votışe: ısət ım pandemiya nəticədə İronədə mardə kəson miğdor bə 76231 nəfər rəsə.

Xanım Lari həmçenin elanış karde ki tojədən 14246 nəfər bə Koronavirusi mıbtəlo bıə kəs İronədə peydo bin ki çəvonku 2175 nəfər hələ noxəşxonəonədən və çəvon vəziyət çok ni.

İronədə tosə bə ısət 2722007 nəfər Koronavirusi qətəşone ki de xoşbəxtiyəti noxəşon miqdoriku 2179890 nəfəri hal-əhvol çok be və əvon noxəşxonəonku mırəxəs və ozod bıən.

Ğeyd kardənine ki tosə bə ısət təğribən 18 milyon nəfər İronədə Korona testi əncom doəşone.

Bə oxonə statestikaon əsos, tosə bə ısət dınyoədə 161 milyon nəfər Covid-19 virusi qətəşone ki çəvonku 3 milyono 346 həzo nəfəriku vey ıştə coni dastiku doəşone.