Rəisi prezidenti dıvrədə İron iyən Boku miyono əloğəon bə inkişof bərəse.

Azərbaycan Respublika milli parlamenti 2 qılə nımoyəndəon nəzəku İroni tojə vıjniyə bıə prezident Seyd İbreyim Rəisi dıvrədə İron iyən Boku miyono əloğəon bə inkişof bərəse.

Bə Speys televeziya kanali raporti əsos, deputat Elman Nəsirov, İroni tojə vıjniyə bıə prezident Seyd İbrohim Rəisiş qıləy siyos zınə şəxs bə hisob varde və izhorış karde ki əv hukmən İron iyən Azərbaycan Respublika miyono bıə steratejik əloğəon inkişof roədə səy-cəhd bəkarde.

Azərbaycan Respublika milli parlamenti co qılə nımoyəndə Əziz Əli Əkbərov həm bə həminə kanali votışe: Ğərəboği canqi bəpeşt İron iyən Azərbaycan Respublika miyono bıə həmkarion bə tojə mərhələ varid bıə, xususi məntəğədə nəğliyot cəhəto icod bıə karidoron ki hukmən 2 qılə kişvəri miyono ticari və iğtisadi cəhəto mıbodiləon inkişofi bois bıdə.

Əkbərov əlovəş karde: sıvoy ım ki kom əğidə ya şəxs İronədə dıvləti yol bıbu, İron iyən Azərbaycan Respublika miyono bıə steratejik əloğəon ijən bə inkişof və ozavziye tərəf bəşe boçi ki ın de 2 qılə kişvər iyən milləti mənafe həmohənqe.

İroni 13-ə dıvrə prezident vıjnımonədə Seyd İbrohim Rəisi de təğribən 18 milyon sədo kəsb karde bənə İroni 8-ə prezidenti unvani vıjniyə bəy.