Zərif: ətomiyə təvafuğ, bə İroni əleyh təhrim və sanksiyaon ləğvış kardə.

İroni xarıci vəzir Muhəmməd Cəvad Zərif Yanvari 24 ədə İroni ticarət palata iclosədə voteşe: ətomiyə təvafuği ko və foydə ım be ki bə İroni iğtisodi əleyh həmonə ətomiyə təhrim və sanksiyaon ləğv bıkə, boçi ki İroni ətomiyə mıvzo bə əmniyyət şura daxil bıə be və bə İroni əleyh təhrim və sanksiyaon de şiddəti dəvomış be.

Zərif çı ətomiyə təvafuği qıləy muvəffəğiyətonış, beynəl-xalğiyə vəziyəti bo İroniro orom karde hisobış kardə və təsdiğ kardə: bə ətomiyə təvafuği əleyh hələ hiç ciddiyə xətər ni.

İroni xarıci vəzir təkid kardə: ətomiyə təvafuği muvəffəğiyət ım be ki bo İroniro beynəl-xalğiyə ticarət və siyasət sahədə qıləy stabilə atmosferış icod kardə, bəçəy xoto İroni deşmenon dılışon be və cəhdışon karde ki ım təvafuği bəpeştə vəziyət orom məbu.

Zərif bə ım nuktə işorəş karde ki ətomiyə təvafuğədə Amerikaədə eteğadışon be ki İron hiç santifuq və co ətomiyə təchizaton bəpe xıvand məbu və hətto ğeydışon kardə bən ki İron bəpe qonə ovi reaktori həm soyb məbu, ijən jıqo votəşone ki təhrim və sanksiyaon bo Amerikaro vey yolə sərmoyəy, əmmo de ətomiyə təvafuği bərobər həmmə sıxanon və iddiaon məhv bən.