İİR de Az.R və Rusiya həmkarəti inkişaf karde ro proqram hozo kardəşe.

İİR de Az.R və Rusiya ticarəti həcmi ziyod karde ro konkret planonış heste. İroni İğtisadiyyati vəziri muavin Əlirza Peymanpak`i bı barədə votəşe ki, de ım məğsədi əvon marzi ətrofi tranzitə roon, Ostoro şəhəri infrastrukturon, Şimal-Cənub istiğamətədə de Rusiya fəaliyyəti hevuj karde nəzərədə qətəşone.

Rəşt – Ostoro osınə roy inşa dəvom kardedə. İroni Osınə ro və Liman inşa şirkəti direktori muavin Abbas Xətibi votəyku məlum bedə ki, İİR Prezident İbrahim Rəisi ım roy inşa bə orəx rosnie ro 21 milyon dollari ğədərədə vəsait co karde barədə dəstur doəşe. Rəşt –Ostoro çe  Ğəzvin – Rəşt osınə roy dəvome. Im vəsilə bə istifadə doə bəpeş Fars xəlici Bəndər Abbas və Oman dıyo Çabahar limanonku ticari məhsulon de Az.R və Rusiya ərazion bə Avropa çe co marşrutonsə 20 ruj  rə  rosnie mumkun bəbe.

“Vestnik Kavkaza” sayti apreli 19-də xəbə doəşe ki, İİR vitse-prezident Soren Səttari Moskvadə de Rusiya Səhiyyə vəzir Mixail Muraşko molağat dəvuniəşe. Tərəfon dəvocat və tibbi ovdonon istehsal və əvoni ticarət karde məsələon muzakirə kardəşone.

 İroni Rusiyadə səfir Kazem Cəlaliən bə RİA Novosti votəşe ki, “Tehron de Moskva çe Rusiya “Mir” pul avjor kardə plastik kart sistemi zıne məsələ çe nəzəro dəvunidən. Im dı qılə keşvəri mutəxəssison İroni bankon bə ım sisteni obunie koy səpe ko kardedən ki, ımən bəvon imkan bədo, ıştə maliyyə munasibətonədə çe SWİFT sistemiku jidasti nıbon.

İron həmən de Boku hokuməti Arazə ruy səpe “Xodafərin” və “Ğız ğaləsi” Ovə Elektrikə Stansiyon inşa və istismari barədə bə roziyəti omən. Ğəror heste ki, tərəfon bı koy 22 milyon dollar co bəkarden, 4 manqi muddətədə inşaatə şirkəton ım koy icra bəkan. Az.R Enerji Vəzarəti sərdar Pərviz Şahbazovi məlimat doəşe ki, ım dı qılə Elektrikə Stansiyon zu 280 MeqaVatti ğədərədəy, proyekton icra 2-3 sor dəbəkəşe.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.