Şəhrivərə manqi 1, bə İroni məşhurə alim İbn Sina hurmət noey ruj
Həşi sori şəhrivərə manqi i(avqusti 22) ha sor bə məşhurə alim İbn Sina moəku bıə ruji xoto, ironədə ım ruji de pezeşkon(təbibon) ruji mınosibəti ğeyd kardedən.ım ruji de yolə şəxsiyyəti nomi noey, bə ım yolə alimi tibbi sahədə nıvışıtə iyən təlif kardə kitobon iyən kəşə zəhmət iyən fəaliyyəton xotoe.
bın bərnomədə çəmə məğsəd bə ım ironıjə məşhurə alimi jimoni qıləy mıxtəsər nəzə kardeye.
Əbu Əli Sina qıləy ironıjə məşhur iyən yolə alime ki,dınyoədə tibbi sahədə məşhurə çehrəonku bə hisob omeydə və çəy tibbi sahədə nıvıştə kitobon çandə mıddət dınyo məşhurə ali məktəbonədə tədris bedəbe.ım ruşinfikə alim mıxtəlifə elmonədə vey zıney iyən çəy bəştə bədiqə omə alim iyən mutəfəkkiron no təsiri xoto,əv nəinki,ironədə bəlkəm,ğərbi dınyoədə həm əy çı islomi məşhurə alimi unvanədə ğeyd kardedən.
Əbu Əli Huseyn ibn Əbdullah ibn Sina Hicri-Ğəməri 370-ə sori çı Samaniyon çə vaxtnə paytəxt Buxara şəhri ətrofədə qıləy diyədə bə dlınyo çəşış oj karde.ım dıjdə həkim iyən filosof ki,peşo islomi dınyo fəlsəfə eımədə qıləy əbədiyə çehrə unvanədə mande və bəy bənə “şeyxur-rəyis”,”huccətul-həğğ” və “şərəful mulk” nomonışon noəbe.İbn Sina hırdənəti vaxtonku qıləy zumandə istedod iyən əcibə ləyoğət və mıxtəlifə elmon sahədə təlim vindey həvəsış hestebe.çəy penc sinnış beyədə,ıştə elm iyən fəzli əhl bıə pı palu,riyaziyyat,Ğıroni dimiku handey,ərəbi zıvoni qrammatikə və sayirə umuteşe.əv çə həmonə sıftəku qıləy vey huşinə əğıl be iyən bo mıxtəlifə elmon umutero ziyodə şovğ və həvəsış hestebe.çandə mıddət bəpeştə bə məktəb şe ki,əyo həm bəsə qırd şoqirdonsə barzə dərəcədə dəsr handedəbe.əv da sinnədə Kərimə-Ğıronış hifz karde iyən ədəbiyyot,həndəsə,riyaziyyat,ərəbi zıvoni sərfı-nəhvı elmon çok-çoki zıneydəbe.İbn Sina bə təbyət,beməyon iyən heyvonati ziyodə və məxsusə həvəsış hestebe və ıştə vaxti veyni səhroədə dəvordıneydəbe və əyo əvoni təcrubəku dəvordınedəbe.jıləvoni əv çı hırdənəti zəmoniku bə rəsəyon iyən çəvonku hozzı bıə damonon və umumən bə təbobət elmi ıştə qıləy interes nışon doydəbe.
Əbu Əli donzə sinnədə be ki,çəy pı əvış Əbdullah Natli nomo qıləy ustadi palu vığandeşe ta çəy palu ıştə məlumaton təkmilko.çəy bənav həm Əbu Əli fiğhi elmış çı İsmayil Zahidi tonoku təlimış vinde.çəy huş bə həddədə be ki,qahi vaxt elmiyə bəhsonədə tojə mətləbon pəydu kardeəbe və ım bəçəy ostadon təəccıbi boyis bedəbe.Natli həm əy bə ziyodə elmon umutey təşviğ kardedəbe və jıləvoni Əbu Əli məntığ elmış umute və peşo de riyaziyyati elmi təkmili məşğul be. əv boştə məlumaton səviyyə bəpe bardeyro,ıştə dastış rəsə qırd kitobonış mutaliyə kardeşe və bə tibbi elmon ayid məlumaton həmçinin jıləvoni bə dast vardeşe.
Əbu Əli həjdə sinnədə beyədə,dıminə Nuh Buxarada hukumət kardedəbe.qıləy ruj çı əmiri ğulamonku qıləyni çəy palu ome ta bo əmiri mualicə kardero əy bobəy.Əbu Əli Sina Buxara hakimış mudava iyən mualicəş karde və çəykuş tələb karde ta əmir icozə bıdoy əv ozodonə şikilədə bə saray kitobxonə daxil bıbu.boçiki,çə kitobxonəku fəğət şahzadəon iyən yolə şəxson istifodə kardey həxışon hestebe .de ın tərtibi çı İbn Sina elmi təlimi royədə qıləy fəsl oj be və əv çı Buxara səltənəti kitobxonəku ki,çə zəmoni vey komil iyən dıjdə kitobxonə bə hisob omeydəbe və çə kitovxonə əksər kitobon ğədimi iyən kamyab be,istifodə kardey həxış bə dast varde.