Tehroni cımə nımoji Xətib: milləti deşmonon çı iğtişoşi dumoədən.
Tehroni cımə İmomi Xətib dəvarədə rujonədə bıə iğtişoşon barədə təkidış karde: milləti deşmənon çı iğtişoşi dumoədən.
Qılə holədə ki kali çı İroni millət, şahrvand Xanım Məhsa Əmini marqiku vey norohətin və çı təhğiğon nəticə intizorədən, dəvardə rujonədə bıə bəzi şəhron əcumlə Tehronədə etırazon bə umumi vırəon zərəl-ziyon varidış karde.
Zinə şəv həm, Tehron iyən İroni çand qılə şəhronədə, bə Xanım Məhsa Əmini marqi bəhonə xoto, iğtişoşçion bə umumi iyən xususi təsisaton və əmniyyəti mudafiə kardə kəson həmləşon karde.
Im həmləonədə, de iğtişoşçion vositə bə İmdod, ambulanson və vəşokıştə maşinon həm zərəl-ziyon varid bıə. jəqo ki tosə bə ısət səhiyyə iyən imdodiyə məmuronku çand nəfər zəxmin iyən noxəşxonəonədə oloxtoniyəşone və 61 qılə ambulans həm xərob be.
Bə İrna raporti əsos, dəvardə haftədə Tehroni cımə ibodi iyən siyosi nımoji xotbəonədə, Sed Əhməd Xatəmi dəvardə rujonədə bıə iğtişoş mıvzo barədə votışe: qıləy şahrvandi mardey vey təəssufinə hodisəy və əmə bə çəy ailə təsliyət votedəmon iyən əvonro səbr urzu kardedəmon.
Tehroni cımə nımoji xətib ijən əlovəş karde: ım mıvzoədə İroni həmmə rəsmi şəxson varid bıən, prezident, məhkəmə ğıvvə rəis, ğanunənə ğıvvə həm varid bin və ım məsələ barədə nığılə təhğiğon əncom beyro təkidışon karde və ım çı İroni nizomi əminə rəsmi şəxsonin ki bəştə əmonətdorəti veyə imonışone iyən həminə məsələ barədə millət həm bəştə rəsmi şəxson bovəmandin ki hukmən ım xanımi marqi barədə təhğiğon nəticəon həm oşko bə millət vote bəbe.
Əhməd Xatəmi ijən votışe: veyə zəmone ki milləti deşmənon iğtişoşi dumoədən, bəhonə dumoədə bin əmmo muvəffəğ nıbıən, ta ım ki ım bəhonə icod bıə ki ın bo əvon vey muhimmə bəhonə bə hisob omeydə.
Tehroni cımə nımoji xətib ijən əlovəş karde: əmo vindeydəmon ki yeqanə məsələ ki ım iğtişoşçionro muhimm nıbe, həminə xanımi məsələ be, boçiki rəsmi şəxson vey ciddi surəti səhnədən və ım məsələ detali oşko bey dumoədən.
