İron və Əfğanıstoni hınə soybon əsəron nımoyışqo oj bıey

Tehronədə, İron və Əfğanıstoni hınə soybon rəssaməti əsəron nımoyeşqoh oj be

Zinə rujiku Tehroni Razi nomo bıə mədəniyət mərkəzədə, İron və Əfğanıstoni hınə soybon rəssaməti əsəron mıştərəkə nımoyeşqoh ıştə koş bino kardə.

İron və Əfğanıstoni hınə soybon rəssaməti əsəron nımoyeşqoh bə Vəhdət haftə yolqətey mınosibəti xoto, bə rəhmət nımoyeşqoh nom noə bıə.

Zinə Hicri Ğəməri 1444 minnə sori Rəbiuləvvələ manqi 12 minnə ruj, de Miladi 2022 minnə sori Oktiyabrə manqi 9 minnə ruj bə qıləy rəvoyəti əsos, İslami qıromiyə peyğəmbər Həzrəte Muhəmməd Mustəfa(s)-i milad ruji sorəqardış, iyən vəhdət haftə bino bey ruji bərobəre.

Sınnion əholi, Rəbiuləvvələ manqi 12 minnə ruj və şiəyon ım manqi 17 minnə ruj, İslami qıromiyə peyğəmbər(s)-i milad ruji sorəqardış zıneydən.

İron İslam Respublika Yolə Təsisəkə, Həzrəte İmom Xomeyni(r) ki ıştə islam dınyoədə vəhdəti vanq kardə bıə kəson be, ım məsələku vəhdət və islami qrupon nez beyro istifodəş kardə və ım 2 qılə torixi miyono (Rəbiuləvvələ manqi 12 tosə 17 minnə ruj) vəhdət haftə nom noəş be.

Im nımoyeşqoh sərkatib, Əhməd Tacik, de İran Peres aqentiyəti ixtisosiyə mısohibədə, votışe: həminə nımoyeşqohədə, İron iyən Əfğanıstoni hınə soybonku 30 nəfəri, rassoməti, siyah ğələm, çuy səpe həkkoki və kalliqrafiyə baxşədə, 130 qılə əsəri de mıxotəbon vosiyə vindey bıdə.

Im nımoyeşqoh de ım hədəf bərpo bəbe ki İron və Əfğanıstoni milləton miyono vəhdəti nışo bıdə.