Ərəs umumiyə məntəğədə Sepah zəmini ğıvvon zumandəti nomo hərbi manıvri bərpo bey.

İroni Ərdəbil və Şərği Azərbaycan ostanon şimolədə bıə, Ərəs umumiyə məntəğədə İslamiyə İnğilobi Sepah təşkilati zəmini ğıvvon zumandəti nomo yolə manıvr bino bıə.

Bə zinə ruji İrna raporti əsos, ım yolə manıvri bərpo bey, bə har sornə kəşə plani məmuriyəti əsos, və Sepah zəmini ğıvvon canqi hozzoəti bə inkişof rosniye hədəfi əncom bəbe.

İslamiyə İnğilobi Sepah Təşkilati zəmini ğıvvə kamandir, qeneral Muhəmməd Pakpur elanış karde: heli burn paraşut əməliyaton, şəvədə həmləon əməliyot, helikopter canqi əməliyot, intihor və canqi əməliyoton və həmçınin Ərəs nomo bıə ru səədə pard soxtey və rabitə caddəon kontrol kardey və bandə vırəon soyb bey və hıcum surətədə əməliyaton əcumlə ım manıvri muxtəlifə baxşonin.

Qeneral Pakpur ijən əlovəş karde: ım manıvri mesaj hamsuyə kişvəronro, sulh, dusti və stabilə əmniyyəti ğoym kardey iyən deşmənonro kişvəri marzonku mudafiə kardey cəhətədə, co qılə silohinə ğıvvon kənoədə, Sepah zəmini ğıvvə hozzoəti elan kardey və ğoym surətədə bə harcurnə təhdid cəvob doey bəyonış kardə.

İslamiyə İnğilobi Sepah təşkilati zəmini ğıvvə(NEZSA) çı Sepah Təşkilati 5 qılə baxşonku qıləyni bə hisob omeydə ki de 100 həzo nəfəriku vey əktivə hərbi uzviyəti, ın təşkiloti vey muhimmə baxşon təşkil dodə.