İroni xarıci investisiya cəzb bə 5 milyard dollar rəsə.

İroni iğtisodi vəziri muavin votışe: 13 minnə dıvlətədə, xarıci investisiya cəzb kardey miğdor 2.4 milyard dollariku bə 5 milyard dollar rəsə.

Miladi 2021 minnə sori Avqustə manqi 3 minnə rujədə, İroni 13 minnə dıvləti ko bino bey zəmoniku, xarıci siyasətədə de balans icod kardey elami, de hamsuyəon iyən məntəğə kişvəron  həmkoəti hevujəti, ıştə xarıci bərnoməon iminnə koon ğərorış doə.

Regionalizm  siyasət, bə şərğ diyə kardey, beynəlxalğ iyən məntəğə təşkilaton iyən onemonon əcumlə Şanxay iyən Eko iğtisodi həmkoəti təşkilatədə iştirok kardey əcumlə İroni xarıci siyasəti balans icod kardey nımunəonin ki 13 minnə dıvləti səmtiku dumo bəbe.

Bə İrna raporti əsos, İğtisodi vəziri muavin və İroni texniki və iğtisodi koməkon və investiya təşkilati rəis, Əli Fekri əlovəş karde: ım muhimmə koon, İroni ısətnə dıvlətədə de metodon əvəz kardey vositə, əncom bıə ki bəpe kişvəri co qılə ostanonədə həm əməli bəbe və ım roy dəvom peydo kon.

Fekri ijən təsdiğış karde: çəşəçi iğtisodi inkişof, 80 milyoniku vey cəmiyət, yolə vojori soyb bey və de muxtəlif və veyə dərs handə mınosibə koəkə, muxtəlifə iğlim iyən coqrafiya soy bey və bə hamsuyə kişvəron və Kaspi dıyo baxşi çand sa vojoron nez bey, mınosibə strukturon sistemon iyən istehsol və ticari şəbəkəon icod kardeyro veyə cəhdon əncom doey və beynəlxalğə məhsulon iyən xıdməton istehsoli zəncirədə ğəror qətey, investisiyaro İroni kişvəri məziyətonku bə hisob omeydə.