Ğalibaf: Şirazədə cinoyət subitış karde ki deşmonon İroni təcziyə kardeyro plan kəşəşone.

İroni İslamiyə Parlamenti rəis, Şahçiraği terroristiyə həmlə barədə təkidış karde: ım cinoyət subitış kardə deşmonon İroni co kardeyro plan kəşəşone.

Abanə manqi 4 minnə ruj, Çoşəmbə rujədə, qıləy silohinə şəxs bə Şahçiraği pokə hərəm varid bıə və bə zayiron səmt qullə ğandışe ki bə Farsi ostandari əmniyyəti-siyasi muavin, Muhebbipur elani əsos, ım terroristiyə hodisədə 13 nəfər şəhid iyən 30 nəfər həm zəxmin bıən.

DAEŞ terroristiyə qrup qıləy bəyoniyə ğolibədə ım hərəkəti məsuliyəti ğəbulış kardə.

Imruj, parlamentədə, İroni İslamiyə Parlamenti rəis, Muhəmməd Bağır Ğalibaf, Şirazi Şahçiraği hərəmədə terroristiyə cinoyəti bə şəhidon ailəon iyən İroni millət təsliyət votışe.

Bə İrna raporti əsos, Ğalibaf ijən votışe: jəqo ki İslamiyə İnğilobi Yolə Rəhbər hamiyedən, bəpe ım faciə icodəkəyon rişə təğib iyən çəy barədə zumand və ağılmandə hərəkəton əncom bıbu.

İroni İslamiyə Parlamenti rəis ijən əlovəş karde: ım cinoyət subitış karde ki deşmonon İroni co kardeyro plan kəşəşone ki deşmon pidəşe İroni əmniyyəti məhv ko.