Tehroni Cımə nımoji xətib: Amerkə hədəf, ğovmi məsələon təhrik kardeye.
Tehroni cımə nımoji xətib, İronədə oxonə iğtişoşon iyən fitnəonku Amerkə hədəfi, çı ğovmi məsələon təhrik kardey iyən daxıli canq zınəş be.
Bə Tele-Rədio aqentiyəti raporti əsos, zinə Tehroni cımə nımoji xətib, Huccətul İslam vəl muslemin Kazım Seddiği de dınyo istikbori mubarizə bardey milliyə ruj yəni Abanə manqi 13 minnə ruji yolqətə iyən bə Amerkəku İroni milləti nifrəti rişəon işorəş karde və İroni milləti umumiyə votımononi " Amerkə bımardo" bə hisobış varde, ijən təsdiğış be: Amerkə əlovə bə beynəlxalğə ictimaiyəti xiyonət kardey və bə muxtəlifə kişvəron həmləon, 60 qılə hərbi dəqardımoni ıştə nəhsə karnomədə ğeydış kardə, və bənə təcavuzəkə, xunxar iyən ğarətəkə rejimi həmişə çı milləton həxi poymolış kardə.
Tehroni cımə nımoji xətib ijən bə Əfğanıston iyən İrağədə bıə Amerkə siyasəton məğlubiyət işorəş karde iyən təsdiğış karde: bə İroni ələyh sanksiyaon, Amerkə rıso bey bois bıə, boçi ki sanksiyaon, İroni milləti soxtəşe, milləti aqahəti bois bıə, bə elmi əsos bıə zıney elmon bə inkişof rosniyə və bois bıə ki əmə bə daxıli zu iyən estedadon təkyə bıkəmon.
Huccətul İslam vəl muslemin Kazım Seddiği ijən votışe: İronədə bıə oxonə iğtişoşon iyən fitnəonku Amerkə hədəf, milləti ittifoği məhv kardey, ğovmi məsələon təhrik kardey və daxıli canq icod kardey be, əmmə millət nə fəğət de mızdoron həmroətişon nıkardə, bəlkəm deştə vəhdət, milli zumandəti oqətey və de İroni Yolə Rəhbər və şəhidon xuni tojə peyman dəbastey vositə, bə Amerkə siyasəton "nə" votışoe.
Tehroni cımə nımoji xətib, İronədə bıə iğtişoş və fitnə icod kardeyku Amerkə co qılə hədəf, muğaviməti cəhbə zəif kardey zıneydə iyən votışe: Amerkə cəhdış kardedə ki de İroni zəif kardey muğaviməti cərəyoni zəif ko, əmmo amerkə bəpe bızno ki muğaviməti rohiyə və zumandəti bə nav şe holədəy.
Huccətul İslam vəl muslemin Kazım Seddiği ijən Həzrəte Şahçerağ(ə)-i pokə hərəmədə bıə terroristiyə hərəkəti vədə, bəşər həxon iddioəkəyon və beynəlxalğə onemonon sukutiku tənğidış karde və ım məsələ bəşər həxon iddioəkəyonro rısvoçiyəti zıneydə.
