Rəyisi: Tehron-Pekin rabitəon mehkəm kardey qlobal əmniyyəti hevujətiədə təsirış heste

İron İslom Respublika prezident, de Çini prezidenti vindemonədə votışe: Tehron-Pekin rabitəon mıhkəm kardey qlobal əmniyyəti hevujətiədə təsirış heste.

Bə İrna raporti əsos, Zinə Seşəmbə rujədə, İron İslom Respublika Prezident, de Çini prezident Şi Cin Pinqi vindemonədə iğtisodi, ticori, elmi, texnoloqiya iyən mədəni muxtəlifə baxşonədə bə 2 qılə kişvəri rabitəon hevujəti təkidış kardə iyən məntəğədə sulh iyən stabiləti mıhkəm kardey cəhəto, İron və Çini miyono stratejikə həmkoəti komilə sənədi icro kardey zıneydə.

İroni prezident Seyd İbreym Rəyisi ki zinə qıləy 3 rujə səfəri çərçivədə de Çini prezidenti rəsmi dəvəti bə Pekin varid bıə de ım kişvəri prezident Şi Cin Pinq vindemoni cərəyonədə bə 2 qılə kişvəri miyono bıə iğtisodi, ticorət, elmi, mədəni və texnoloqiya baxşədə bıə əloğəon inkişofi işorəş karde və İron Çini miyono stratejikə komilə muğavilə imzo bey çı məntəğə sulh və stabiləti cəhəto zınəş be.

Rəyisi İron və Çini bənə saxtə rujonədə bıə 2 qılə dust zınəş be və Çini tərəfo bə İroni ərazi təmamiyyəti təkidış karde, beynəlxalğ sistemədə de unilateralizm mubarizə barde iyən dınyoədə de xarıci muxalifət karde vindemoni bə təğdiri loyğ zınəş be.

Həminə vindemonədə Ağaye Rəyisi bə atom muzakirəonədə Çini mısbətə roli işorəş karde və votışe: ğərb de Amerkə rəhbərəti ijən İroni milləti barədə ıştə hisob kitobonədə səhv kardışone boçi ki İroni millət ijən bənav şedə.

Çini prezident həm ıştə sıhbətonədə bə 2tərəfi stratejik muğavilə işorəş karde və votışe ki Çin de İron ıştə əloğəon inkişof doe fikədəy.

Əv beynəlxalğ sahədə ğərbi kişvəron zu tətbiğ karde və unilateralizm siyasəton tənğid və dəy mubarizə barde tələb kardışe.