Rəyisi: xarıci siyasət, de həmmə kişvəron rabitədə bə balans icod kardey əsose

İron İslom Respublika Prezdent təkidış karde: xarıci siyasət, de həmmə kişvəron rabitədə bə balans icod kardey əsose

Zinə Dışəmbə rujədə, bə milləti əsos bıə devləti mudiron iclosədə, İron İslom Respublika Prezdent Seyd İbreym Rəyisi daxıli siyasət bə daxıli vey yolə zərfiyəton təkyə kardey və xarıci siyasət de həmmə kişvəron rabitədə bə balanc icod kardey əsos zınəşe.

Bə Prezdenti məlumatərosnə mərkəzi raporti əsos, Rəyisi ijən əlovəş karde: de həmmə dınyo kişvəron de balanc surəti rabitəmon heste əmmo hiç vaxt kişvəri məsələon bə çand qılə kişvəri sıhbəton rabt nibədomon və ımruj har qılə kişvər ki pidəş bıbu de İron İslom Respublika rabitəoş bıbu, çət zəminə hozzo kəmon.

Prezdent həmçınin votışe: jəqo ki İslomi İnğilobi Yolə Rəhbər təkidış kardə, nuyə sorədə, bə qıləy tojə rohiyə və qıləy təhəvuli diyə ehtiyocımon heste.

Rəyisi ijən təkidış karde: veyə roon oj bıə və deşmoni tələbon əks vey roon həm oj bəbe.

Prezdent ijən işorəş karde: dəvardədə vey çokə koon ki əncom bıə, ijən əlovəş karde: təhəvuli cəhəto diyəon ıme ki cəhd kəmon ta əncom bıə hərəkəton vey zumandə noğtəon zumand bəbe iyən çəy zəifəti noğtəon həm əvəz bıbu.