İron və Ərəbiston iğtisodi mınosibə rabitəon royədən

İroni iğtisodi vəzir votışe: İron və Ərəbiston iğtisodi rabtəon və əloğəon royədə bə çokə nəticəon bərəsən.

Bə İsna aqentiyəti raporti əsos, İroni iğtisodi vəzir, Seyd Ehsan Xandozi ki Pencşəmbə rujədə İslomi inkişofi banki (İSDB) har sornə iclosədə iştirokiro bə Ərəbistoni Cəddə səfərış kardə be, ım iclosi kənoədə və de Şərğ Əlvəsəti rujnomə mısohibədə votışe: ım iclosi kənoədə de Ərəbistoni iğtisodi vəzir vindemon bəkam, və etığadım heste ki İron və Ərəbiston iğtisodi rabtəon və əloğəon royədə bə çokə nəticəon bərəsən.

Xandozi ijən bəyonış kardə: İroni tojə devləti siyosət, de hamsuyəon və ərəbi kişvəron rabitəon inkişof doeye və ijən təsdiğış kardə: əmə har qılə mevzuku ki bois bıbu de hamsuyəon və ərəbi kişvəron vey nezə rabitəon bois bıbu himoyə bəkamon.

İroni iğtisodi vəzir ijən əlovəş kardə: bə iğtisodi bıhranon ğələbə kardeyro, islomi kişvəron miyono texnoloqiya mıbodilə və dınyo kişvəron xususi məntəğə kişvəron miyono iğtisodi rabitəon hevujəti, İron İslom Respublika devləti ko və çəmə təklife.

Cımə rujədə, Ərəbistoni Cəddədə, və de 50 qıləku vey islomi həmkoəti təşkiloti uzv bıə kişvəron rəsmi şəxson iştirok, İslomi inkişofi banki har sornə iclos de rəsmi surət, ıştə ko binoş kardə.