İsveç və Danimarkə səfərotoxonə koəvonon co-co bə İroni Xarici koon vəzərotxonə vanq jıey bıən.
İsveç və Danimarkə məmləkətonədə Kərimə-Ğıroni mığğəddəs və nuroniyə zoti təhğır bıey dəvom kardey əloğədor,çın dıqlə məmləkəti rəsmiyon bə İroni Xarici koon vəzərotxonə vanq jıey bıən.
Bə Xarici Koon Vəzərotxonə İnformasiyə və Mətbuat Xıdməti sər İdorə hisoboti əsos,çı İroni Xarici koon vəzərotxonə İnsonə Həxon sər idorə muavini bə Kərimə-Ğıroni təhğır kardə behəyo və yavə hərəkəton dəvom kardeyış de ğətiyyəti məhkumış kardə.
Bə İsveç və Danimarkadə Kərimə-Ğıroni ihonətəkəyon və bə çın dıqlə kişfəri səfərotxonə koəvonon xitob kardə holədə elonış kardə ki,İron İslom Respublikə tam şikilədə məsuliyyət hiss kardedə və bo İsveç iyən Danimarkə hukumətonro Ğıroni təhğır kardey qonə nəticəon hisob kardedə.
İroni Xarici koon vəzərotxonə İnsonə Həxon sər idorə muavini çı İslomə İnğılobi Ali Məğaminə Rəhbəri cinoyətkoron və Kərimə-Ğıroni təhğır kardə mıxolifon dastək doey,bənə bə İslomi dınyo zidd mıhoribə mevğeyi qətey ifodəonış bə yod dənoə holədə,ın cur sui-ğəsdon və təhlukəninə hərəkəton təkror kardey ələyh xəbərdoətiş doə.
İroni Xarici koon vəzərotxonə İnsonə Həxon sər idorə muavini ifodə ozodəti mıəyyən vəzifə və ehdəmonon icod kardey işorə kardə holədə ,İsveç və Danimarkə nımoyəndəonku bə Beynəlxalğə Konvensiyə 19 və 20-ə maddəon əsos bıə beynəlxalğə Mulki və Siyosi Həxon həxədə Pakti ehdəmonon əməl kardeyış piyə.
İsveç və Danimarkə nımoyəndəon həm bə Kərimə-Ğıroni zid har qıləy təhğıri məhkum kardey ayid ıştə məmləkəton mevğeyonışon zikr kardə holədə,ın vəzyəti dərhol bəştə poytaxton əks kardey və ovoştıneyışon elon kardə.
İsveç və Danimarkədə Kərimə-Ğıroni sutuney məsələ,bə mısılmınon və islomə məmləkəton hevujə reaksiyə və çı İMT-i ın təhğiramizə hərəkəti oşkoə etırozi və hətto çın dıqlə kişfəri hakimiyyət orqanon həm bə ın cur hərəkəton ələyh bıey dayir vədon rəğmən,oxonə vaxtonədə çandə dəfə və zəmon-zəmon anti-islamiston Kərimə-Ğıroni təhğır kardey,bə dınyo mısılmınon ğəzəbi boyis bıə.
