Rəyisi: Ğəzzə hodisəon, anti bəşəri hərkətonku vey norohətə nımoyeşqohe

İron İslom Respublika prezdent, Ğəzzə hodisəon, sionist rejimi anti bəşəri hərəkətonku vey norohətəkə nımoyeşqoh bəyonış kardə.

Bə Ğəzzə tanqə jimoni vırəon sionist rejimi vəhşiyə həmləon bə 4 minnə befosilə haftə varid bıə iyən bə Fələstini səhiyyə vəzorətxonə elani əsos, tosə ısət 8 həzo 500 nəfəriku vey Fələstinıjon şəhid bıə ki ım miğdoriku nimə məzlum və be mçudafiə hırdənonin.

Bə prezdenti məlumatərosnə mərkəzi raporti əsos, Zinə İron İslom Respublika prezdent, Seyd İbreym Rəyisi devləti heyəti iclosədə votışe: Ğəzzə hodisəon sionist rejimi anti bəşəri hərəkətonku qıləy norohətinə nımoyeşqohe, ım hərəkəton əcumə milləti həmmə tərəfiyə mıhosirə və ğədəğənə bombaonku istifodə kardey ijən dınyo ictima çəşon vədə bə ım məntəğə damon və xorək koməkon vığandey iyən komək rosniye vəy qəteye.

Rəyisi ijən bəyonış kardə: Ğəzzə hodisəon, əmniyyəti icod kardeyro dınyo təşkiloton məğlubiyətiku oşkoə nışonəy, əv ijən əlovəş kardə: Cəbəliyyə kəmpi vəhşiyə bombardımon iyən beqınohə milləti ğətli-am kardey, dəvardə 20 rujədə bə bəşəriyəti ələyh cinoyət və sionist rejimi canqi cinoyəton dəvomi bəhisob omeydə.

İron İslom Respublika prezdent ijən ım cinoyətədə bə Amerkə sərostə roli təkidış kardə  boçi ki Amerkə bə sionist rejim, hərbi koməkon və silohinə təchizaton vığandedə iyən çəyku siyoni himoyəon əncom dodə əv ijən təsdiğış kardə: ım cinoyət nışoş do ki vey beynəlxalğə təvafuğnoməon iyən İMT prinsipon ıştə etıbo dastiku doəşone iyən vey zərurie ki beynəlxalğə ictima ım koədə bə umumi fikon tələbi əsos, tojədən nəzə bıdən.

Rəyisi ijən Ğəzzədə otəşvasti  ğətnomə bə imzo rosniyero umumi əssembeliyə  uzvon ğoymə sədo beynəlxalğə ictimaədə Amerkə izolozasiya zəminə icodış kardə.