İronədə bıə HƏMAS-i nımoyəndə: sionist rejimi cinoyəton vədə, Ərəbi kişəvron sukut məhkum bıə nine
Fələstini islomi muğaviməti hərəkəti nımoyəndə(HƏMAS) sionist rejimi cinoyəton vədə, Ərəbi kişəvron sukut məhkumış kardə.
Oktiyabrə manqi 7minnə rujədə, Fələstini muğaviməti qrupon, de Ələğsa Tufan nomo əməliyoti vositə, bə sionist rejimi ələyh ıştə həmləon bino kardışone. ım məğlubiyəti bəpeşt, Telaviv, intiğom sıey hərəkəti çərçivədə, de şiddətin surət bə Ğəzzə həmləş kardə.
Bə Ğəzzə səhiyyə vəzorətxonə statestikaon əsos, sionist rejimi həmləon dumoədə, Ğəzzə şəhidon miğdor, 11 həzoku vey əlovə bıə ki ım miğdoriku vey jenon və hırdənonin. ğeyri hərbion ğətli-am kardey və sioniston cinoyəton xəbəon nışo doeyədə ğərbi mediyaon be meyli dınyo tənğidon icodış kardə.
Həminə cəhətədə və bə İrna raporti əsos, Cımə şəvədə Fələstini islomi muğaviməti hərəkəti nımoyəndə(HƏMAS) Xale Ğodomi de İroni şimol şərğ, Taybad şəhrıstoni kali sınnion alimon vindemonədə votışe: Ələğsa Tufani əməliyoti bəpeşt, sionist rejimi hərbiçiyon ıştə varid bıə ziyanon əvəziro, bə Ğəzzə məzlumə milləti ələyh, vey şiddətinə həmləon proqonoz kardışone.
İronədə bıə HəMAS-i nımoyəndə bə Fələstini milləti beynəlxalğə koməkon kam beyku tənğidış kardə və de işorə bə ım ki tosə ısət, və muğaviməti hərbiçiyon Ələğsa Tufani həmlə bəpeşt, fəğət 50 qılə boy maşini humanitarə koməkon bə Ğəzzə rəsəşe, əv ijən votışe: sionist rejim və çəy icod kardə və himoyə kardə kişvəron Ələğsa Tufani zərbəon əvəzi dumoədən və ısət bə vey hırdənon və ğeyri hərbiçiyon həmlə kardedən.
Ğodomi ijən bəyonış kardə: xiyabononədə, co qılə kişvəron milləti iştirok, və beynəlxalğə vırəonədə sionist rejimi cinoyətkorə hərəkəton məhkum kardey, Ələğsa Tufani vey muhimmə nəticəonku bə hisob omeydə.
