De Ğəzzə təhəvvulaton mehvəriyət, Əmirəbdullahiyan və Suriyə iminnə vəziri vindemon

Zinə şəv, İroni xarıci vəzir, Huseyn Əmirəbdullahiyan və Suriyə iminnə vəzir, Huseyn Ərnos deyande vindemon və Ğəzzə və Fələstini təhəvvulaton barədə deyande votımon kardışone.

Bə İran Peres aqentiyəti raporti əsos, ım vindemonədə Huseyn Əmirəbdullahiyan de işorə bə Ğəzzə və Fələstini təhəvvulaton, sionsit rejimiku Amerkə həmmə curnə himoyə, Ğəzzə be mudafiə milləti ələyh ım rejimi təcavuzi vey muhimmə amil zınəşe.

Im vindemonədə ijən Suriyə iminnə vəzir əlovəş kardə: muğaviməti cəhbə vəhdət və i bey bois bıə, Ğəzzə velo və məhv bey, Fələstini milləti ıştə kəku xarıc kardey və muğaviməti məhv kardeyro sionist rejim və Amerkə plan be nəticə bıbu.

Sionist rejim de ğərbi kişvəron həmmə curnə himoyə vositə, Ğəzzə tanqə və ğərbi sahilədə bə Fələstini məzlum və be mudafiə milləti ələyh hevujə ğətli-am əncom bıdə.

Zinə rujədə, Ğəzzə səhiyyə vəzorətxonə, de qıləy bəyoniyə elanış kardə ki dəvardə 66 ruji mıddətədə, sionist rejimi hərbiçion təcavuzi nəticədə, 18 həzo 205 nəfər şəhid bıən.

Im qıləy holədəy ki dəvardə Cımə haftədə Ğəzzədə təcili otəşvəsiro, İ Bıə Milləton Təşkilati şuraədə qıləy ğətnomə bə sədo noə bıə ki bə ım illət ki Amerkə bənə əmniyyət şura daimə uzv de ım otəşvəs muxalif be, ım ğətnomə veto bıə.