Amerkə tojə sanksiyaon barədə İroni reaksiya.

İroni prezidenti i minə muavin İroni tojə ehtımaliyə sanksiyaon barədə votışe: ım mıvzoe İroni dıvlət və xarıci vəzarətxanədə təğib bəbe və əqə bə ətomiyə təvafuği zidd bıbu yəğin mınasibə reaksiyaon əncom bədamon.

Eshağ Cəhanqiri bə İrib votışe: bə İroni əleyh Amerkə təsdiğ bıə təhrimon əqə ətomiyə təvafuği əleyh həm məbu beynəl xalğ sahədə Amerkə dıvləti be abro iyən be etebor bəkay.

Cəhanqiri bə muğavimətiyə iğtisodi əsəron ijən İroni iğtisodi çokə vəziyət işorə karde bəpeştə təsdiğış kardə: İron islam respublika deştə vəhdət və i bemon detosə bə ısət çandə təhrim və sanksiyaon vədə muğavimətış kardə.

Əmmo xəbə omə ki İroni xarıci vəzarətxanə qıləy bəyaniyədə çı Amerkə 15 qılə şirkət və kompaniyaonış təhrimış kardə və sanksiya siyahədə ğərolış do.

Im bəyaniyədə ğeyd bıə ki de həminə Amerkəvıjə kompaniyaon rabitə və həmkari karde ğədəğəne ijən İroni səlohiyətədə bıə sahədə çın şirkəton mol-moyəon toğif və mısodirə karde bəbe.

Bə Amerkə 2 qılə partiyaon tojə layihə əsos ki sınat parlamentədə edaştə bıə, bə İroni əleyh tojə təhrim və sanksiyaon təsdiğ bəbe, əv həm de rəkıtiyə bərnoməon bəhonə.