De Xanım Həzrəte Fatimə Zəhro(s) milad ruji mınosibəti təbrik.

Imruj Hicri Ğəməri 1445 minnə sori Cəmadiul Sani manqi 20 iyən Milodi 2024 minnə sori Yanvari 3minnə ruje, bə təğvimi əsos ımruj de Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro moəku bıə ruji sorqərdışi bərobəre.

Həzrəte Fatimə Zəhra(s) Beesəti 5-nə sori Cəmadius Sani 20 minn rujədə Məkkəədə bə dınyo omə.

Ə Həzrət Hırdənəti faxtiku ıştə qiramiyə dədə Həzrəte Muhəmməd(s) hidoyəton jentonədə de İlahi məərifon oşno be, ijən ıştən çı Xıdo dərqah məxsusə bandəon və İlahi elmon sərçəşmə be.

Xıdo Rəsul(s) qiramiyə kinə çı şiəyon 1-nə İmomi Həzrəte Ali(ə)-i mıhəbbətinə kədə de əəla sirə bəştə həyot həmro iyən inə bey məsuliyəti əməl əki, anədə ki vey yolə tarix soxtə şəxsiyətoni bənə İmom Həsən(ə), İmom Huseyn(ə) iyən Həzrəte Zeynəb(s) çı Xanım Fatimə(s) tərbiyəti sayədə yol bin.

Həzrəte Fatimə Zəhra(s) jimoni sima və obrazi həmmə ləzəon isor, səbr, qızəşt, qinaət, səxavət, Xıdo ibadət iyən bə fəğıron komək kardey ali nımonəonku pur be, həğiğətən ə Həzrət həmmə sahəonədə çı dınyo jenon olqo iyən simvole.

Bə Ğəməri təğvimi əsos ımruj de İslam İnğilobi təsisəkə mərhum İmom Xomeini(r)-i moəku bıə ruji həm bərobəre.

Həmçınin İroni təğvimədə ımruj jenon və inəon ruji həm ğeyd bıə ki çəvon aliyə məğom və vırəku ğədrdonəti bıdə.

De Xanım Həzrəte Fatimə Zəhra(s) milad ruji mınosibəti həmzəman Zinə şəviku İroniədə məxsus mərasimon de səhiyyəvi porotokolon rioyəti bəzi vırəonədə bino bıə ki ımruj həm dəvom peydo kardedə, xususi sosial şəbəkəonədə iyən virtual surəti

İroni Rəşt şəhri Tolışi Rədio koəkəyon tərəfo ımrujnə idə ruji Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro moəku bıə ruji sorqərdışi bə şımə xususi bə həmmə tolışə jenon və tolışə inəon təbrik ərz kardəm, Həzrəti sayədə bıbən.