İroni yolə rəhbər: Amerkə bə Suriyə hucum karde stratejikə səhv və xətoe.

İroni yolə rəhbər zinə de İroni aliyə hərbiyə ğıvvon fərmondəon mılağat karde cərəyonədə bə Amerkə tojə hucum ijən bə Suriyə rəkıtiyə bombardemoni işorəşon kardə və təkidışon kardə: Amerkə ım hərəkət qıləy stratejikə xətoe və əvon ıştə dəvardə rəsmion xətoon tikror karde holədən boçi ki cinoyət, təcavoz, xəto ijən beynəl xalğiyə ğanunon ləğv karde çı Amerkə daimiyə ko heste ki vey kərə dınyo co vırəonədə əy əncom doəşone.

Həzrəte Ayətullah Xamenei votışone: çı Amerkə navnə rəsmion, Daeşi pesoxtəşone və bəy koməkışon kardə ijən Amerkə ısətnə rəsmion həm Daeş və bənə Daeşi zumand karde və ya xot çəvon peştədə mande pidəşone.

İroni yolə rəhbər bə ım nuktə təkidışon kardə ki jıqonə qrupon vıcudi xətər və zərəl taleədə bə Amerkə həm bərəse ijən əlovəşon kardə: Avropa ısət bə çəy xoto ki Təkfiri və Vəhabiyə qruponış qıləy səhvə siyasətədə zumandışon kardə qiriftor bıən və cəmoət ıştə kə və xiyobonədə əmniyyətışon ni ijən Amerkə həmonə ğələti tikror kardedə.

Həzrəte Ayətullah Xamenei təsdiğışon kardə: İron nışoş doə ki jıqonə ğələtə koon bəpeştə meydoniku xaric ni bəbe və millət ijən bə inğilab imon və xatircəm bıə kəson de bə Xıdo təvəkkol karde, jıqonə təhdidonku tarsışon ni boçi ki əqə İron pidəş bıə be bə dumu bemandi ımruj kişvərədə bədbəxti, rohi cəhətiku problemon ijən tarixi və təmədduniyə bohranon bıə be.

İroni həmmə hərbion fərmondə ijən bə ğərbiyə dıvləton bevəcə siyosəton canqədə Səddam rejimi peştədə mande işorəşon kardə və votışone: Avropavıjə riyokorə dıvləton ki ısət Suriyədə iddiyaşone kimiyabiyə silohonku istifodə bıə, İroni 8 sornə mığəddəsə mudafiə soronədə çandə bə Səddam kimiyabiyə silohonışon do ta əv həm çəvonku bə İroni cəhbəon ijən Sərdəşt və Hələbçə şəhron hucum karde cərəyonədə əvoni istifodəş kardə.

Həzrəte Ayətullah Xamenei bə dışmənon bərnoməon çı İroni milləti rohiyə zəif karde ijən rəsmion və silohinə ğıvvon dılədə əbeni ya karde nibəznemon rohiyə ilğa karde siyasəton işorəşon kardə ki: İroni silohinə ğıvvon bəbe de bə Xıdo təvəkkol karde, ıştəni bovə karde ijən bəştə ğudrəti har ruj əlovə kard xoto ıştə zərfiyəti ziyod və hevuj bıkən və deştə əzəmətinə iradəon, çanə zəifəti və ya xot problemon bıbu həl və cobran bıkən.