İmom Xameneyi:Şımə ironıjon ıştə irodə və mehkəməti nımoyiş kardeyone

İslomi İnğılobi Yolə Rəhbər bə İroni xalği de televiziya murociyətədə voteşe:Şımə 22 bəhməni ruji ıştə irodə və mehkəməti nımoyiş kardə holədə dışmeni məyus bıkənən.

Bə Pars Tudey bə Ali Rəhbəri Dəftəri informasiya sayti istinodən doə məlumoti əsos,İslomi İnğılobi Yolə Rəhbər Həzrət Ayətullah Xameneyi işambə ruji ıştə televiziya murociyətədə 22 Bəhmənış çe İroni xalği zu və ləyoğəti bə dim bekardə rujış zınə və mərdumi bın şemonədə bıə iştirok və bə İslomi Respublika sədoğət və bəfodoroəti ifodə kardey,dışmeni bə İroni və bəçəy milli mənafeyon ələyh taməhkoətiku bə dumo okırey vodor kardey təkid kardəşe.

Ə həzrəti hamyəşone:22 Bəhməni ruj ıştə irodə və mehkəməti nımoyiş kardə holədə dışmeni məyus bıkənən.İnğılobi Ali Rəhbəri de televiziya bıə mırociyəti mətn jıqoye:De Rəhmon və Rəhimə Xıdo nomi!

Ha sor 22 Bəhmən çe İroni mərdumi zu və izzəti bə dim bekardə ruje.Bə Xıdo şukr bıbu ki, motivasiyəynə,ğətiyyətin,ğoym,ğədrdon və ıştə mənafeyon və fəsodonku xəbərdor bıə qıləy millət.Həmonə ruj,22 Bəhmənədə İroni millət qıləy dıjdə fəthış karde.Iştə iyən ıştə kişfərış çe xarici mudoxiləonku xilos kardeyış zıne.Həmonə xariciyon bın soron ərzədə hejo piyəşone navnə status-kvo(vəzyəti) bərpo bıkon.

İroni millət ğoyme.Çın mığoviməti simvol 22 Bəhməne.In şemon dınyoədə unikale.Dınyo hiç qıləy vırədə əmə vindəmon ni ki,dırozə soronədə qıləy kişfəri Mıstəğiləti Ruj və Milli Ruji kişfəri həmmə vıronədə anədə de dıjdə izdihomi və cəmyəti  dimbədim booy.Imruj İroni xalğ de bə xiyobonon beşey ıştəni nışon doydə və bə İslomi İroni,bə İslomi Respublika tamə bıə kəson və bın millətədə çəşışon bıə kəson bə dumo pekırey vodor kardedən.

Milli ğudrət rəket və təyyorəonku ziyodə de milləton irodə və deçəvon mığoviməti anqıle.Şık bə Xıdo ki,şımə mığovimət nışon doeyone və ıştə irodəyon nışon doe.Şımə mıxtəlifə məsələonədə  ımi ıjən həm nışon bıdən. Dışmeni məyus bıkənən.çanədə ki,dışmen məyus ni,qıləy millət bə təğibon məruz mandedə.Dışmen rufiku bəpe eqıno.

Dışmen çı rufiku eqıney,şımə ibemoniku,şımə təfəkkur və irodə ğudrətiku,şımə ənqizə iyən  motivasiyaku bəşıkrəy və de şımə bə dışmeni vəsvəsəon ələyh mığoviməti qıləy rabitəş heste. Imon milli zu təşkil kardedə.İnşallah,çəmə cıvonon elmi sahədə,əməli sahədə,təğvo və əxloği sahədə,maddi və mənəvi tərəğği sahədə və mıxtəlifə sahəonədə çanədə zuşon vışkiyedə bənav bəşeyn və hərəkət bəkarde,bo kişfəri şərəf və iftixor bəvardeyn və 22 Bəhmən çımon həmmə təcəssıme.Har kəs bə kuçəon beşeydən şuoron doydən,həyğəton bəyon kardedən və ıştə həmrayəti və çe İroni mərdumi bə İslomi Respublika ıştə sədoğətoi bəyon kardedən.

Umu kardedəm ki,İnşəallah,22 Bəhmən,bənə navnə soronədə bıə qırd 22 Bəhmənon,İroni xalğ ıştə əzəməti dıbərobər bəkarde və diqər milləton,hukuməton,ğudrəton və cokəson çe İroni  milləti vədə bo təslim bey və təvozukor bey məcbur bəkardeyn ki,İnşəallah,ıncur həm bəbe.

Vəssəlamu ələykum və rəhmətullah və bərəkatuh!