İmom Xameneyi doə çəşnavi

Bə AİŞ prezdenti təhdidon cəvobən İmom Xameneyi:Kəştiku vey təhlukənin əy bə dıyo bın ğandə qıləy silohe.

İslomi İnğılobi Yolə Rəhbər"12 rujnə muharibədə çı milləti ğələbə","Dey manqi muhim və ciddiyə fitnə dəfn kardey" və"22 Dey və 22 Bəhmən şemononədə çı xalği əzəmətinə iştirokış" çe əzizə İroni milləti nufuz və bəyjiyəti əlomətonış hisob kardə və bə "hozzıəti,oğoəti və milli ibemoni" mıhofizə və zumand kardey təkid kardə holədə əlovəşon kardə:De dışmeni əloğədorə lideron və fosidə unsuron istisno bıə holədə,əmə çe iğtişoşon qırd şəhidon və ğırboniyon,ə cumlə həm"cəmyəti əmniyəti və dincəti mıdofiyə kardə ğıvvon", "beqınoə royku dəvardə kəson" və hətto"sodəti və ğəzəbi səbəbiku bə fitnə anqıl qıniyə bə dast dəğandə bıə kəson"ıştə evlodon hisob kardedəmon.

İslomi İnğılobi Yolə Rəhbər İmom Xameneyi seşanbə şəvi zəmonədə de Təbriz və Şərği Ozoboyconi çandə həzo insonon həyəconinə didoədə ımsornə sorış ğəribə və de hodisəon pur bıə qıləy sorış zınə.Ə həzrət,Amerkə rəsmiyon və medya bə İroni hucumi anqıl lozım nıbə mıdoxiləon və behəyoə təhdidon işorə kardə holədə votəşone:"Əvon ıştən həm zıneydən ki,bə ın sıxanon və hərəkəton tov vardey zıneydənin və"ıştəni çı dınyo həmməysə zumand hisob kardə qıləy ləşkər " mumkine jıqo qıləy zumandə silli sey bəzıne ki,ıştə vırəku rost bey əzıni;həmçinin,təhlukə ilə mıborizə bardeyədə məsul bıə onemonon tam hozzın və millət bəştə koy və həyoti bəpe de sulh və bovə dəvom bıdon."

19 Bəhmən Həşi 1356-ə sorədə çı Təbrizi mərdumi ğətiyyətinə ğıyomi sorəqardışi ərəfədə dəvordınə bıə bın didoədə Ə həzrət "çəy vaxtədə,hərəkət kardey və fədokorəti" həmonə ğıyomi xususiyyəton miyono hisobış kardə.Ə həzrət,Ozoboyconi cıvonə nəsli mıxtəlifə meydononədə mıjdəvoniəbaxşə iştirokış tarif karde və votəşone:22 Bəhməni şemonədə Təbrizi xalği dıbərobərinə iştiroki nışonış doe ki,Təbrizi millət, Bənə İroni mərdumi əmandə hissə,bəyjiye iyən əhvol-ruhiyyənine və jıqo qıləy millət hiç vaxti bə dışmeni siyosi hənəkon və hiyləon bovə nibəkadeyn.

İslomi İnğılobi Yolə Rəhbər ımsornə sorış bənə İroni milləti"əzəmət,irodə,mehkəmə ğətiyyət və co imkonon" çandə dəfə tikrorinə nımoyiş kardey sor hisob kardə holədə əlovəşon kardə:Millət çandə dəfə zu və tovinəti nımoyiş kardə holədə İronışon səbarz və əzizışon kardə və bın rujonədə bə xaric səyohət kardə rəsmiyon de həmonə kişfəron rəsmiyon vindemon kardeyədə çe milləti xususi nufuzışon çok hiss kardə.

Ə həzrət,Dey manqi fıtnə mohiyyət və cəhəton de"təfəkkur və təhlili odəmon" zıvoni izoh kardey zəruri hisob kardə holəsə votəşe:Bə əməl omə hodisəonədə çandə qılə ğəzəbinə cıvon və sinninə insonon hərəkət və iğtişoşon ni,çe İroni xalği poon jiyədə hırd bıə"bə plani əsos bıə qıləy peqordımon" be.

Həzrət Ayətullah Xameneyi ın fakti izoh kardə holədə əlovəşon kardə:Amerkə İbıə Ştaton və çı seonist rejimi kəşfiyyot və casusəti aqentətiyon,de bəzi co kişfəron kəşfiyyot orqanon koməqi xeyli vaxt bənav bəzi bevəcə odəmon və ya yavə sabiğəşon bıə kəsonışon cəlb kardə,bəvon xaricədə təlim,pul və silohışon doə,bə hərbi və hukuməti mərkəzon təxribot və hucum kardero bə dıləşon vığandə ta Dey manqi miyonə rujonədə bə dast vardə mınosibə fırsətədə bə məydon daxil bıbon.

İslomi İnğılobi Yolə Rəhbər bə"betəcrubə və sodə insonon təsir nışon doey və əvoni ğəzəbin kardey" çı fıtnəkor lideron və amilon tərəfiku ğandə bıə qıləy co qəm hisob kardə holədə votəşe:"Təlim vində elementon ın cur şəxson bənav vığandedən və əvon ıştən mıxtəlifə silohon və de "hoziyəti və be ehtiyotə hərəkəti" siyosəti bə məydon daxil bin və bənə İŞİD-i de ğəribə vızməti "otəşışon je,kışteşone və xərobəşon karde".

Ə həzrət,çın hərəkəton əsosə məğsədışon bo sistemi sutunon zəyif kardeyış zıne və votəşe:"Həlbəttə ki, huğuğ-muhafizə ğıvvon,Bəsic,İİMK və veyə rəğəmədə insonon bə iğtişoşon ələyh beşin və bə qırd bəhonəon və dıjdə xarcon rəğmən,"peqordımon"ojə-oşkoə formədə məğlub be və millət ğalib ome ".

Həzrət Ayətullah Xameneyi "22 Dey və 22 Bəhməni ğəribə şemonış"ilahi əlomət" hisobış kardə və təkidış kardə:Dışmeni bədə niyyəton və suyi-ğəsdon bın şikilədə məğlub kardey zınə İroni xalğ bəpe ın ruşinə ilahi ovandəti de"hozzıəti,oğoəti və milli ibemoni" mıhofizə bıko,oqəto.

İslomi İnğılobi Yolə Rəhbər ıştə nıtği diqər hissədəçe Amerkə ziyodə rəğəmədə bıə ixtisodi,siyosi və sosyal problemonış bənə çe Amerkə imperiya tənəzzul və məhfəti əlamoton xarakterizə kardə holədə votəşone:Amerkə deəmə bıə problem İroni ebordıney tələbe,əmmo İroni xalğ və İslomi Respublika çəvon bəştə məğsədon rəsey ko mane beydə.

Ə həzrət,çı AİŞ prezdenti de təhdidi pur bıə sıxanonış bə İroni xalği hakim bey oruzu iyən tələbi nışonə hisob kardə holədə əlovəşon kardə:İroni millət ıştə İslomi və şiyə dərson çok zıneydən və zıneydən ki, kom zəmon iyən kom ko bəpe bıkon.

Bə İmom Huseyni(ə) bənə mı ikəsi bənə Yezidi bıə kəsi beyətnıkardey dayir torıxi cumlə işorə kardə Həzrət Ayətullah Xameneyi ğeydışon kardə:İroni millət həm votedən ki,bənə əmə bə jıqo qıləy mədəniyyətəi,torıxi və bə barzə təhsili malik bıə qıləy xalğ bənə bə Amerika hakim bıə korrupsionerə insonon beyət nibəkarde.

Ə həzrət,çı "bədnomə cəzirə" hodisədə heyrətamizə ğeyri-əxloği məsələ oşko beyış çı Ğərbi sivilizasiya və liberalə demokratiya realəti əksış zıne və əlovəşon kardə:Ğərbi lideron ğeyri-əxloği koon həxədə çəmə məsə har qıləy çi i tərəfiku,çın ləpəki məsələ həm co tərəfiku.Həlbəttə ki,ım,çəvon kutləvi fəsodiku fəğət iqılə numunəy və ın məsələ oşko nıbe,əmmo oşko be və peşo həni həm veyə çiyon oşko bəbe.

İslomi İnğılobi Yolə Rəhbər çe amerkəvıjon təhdid və hərəkəton yəni bə İroni səmt hərbi kəşti vığandey anqıl votəşe:Həlbəttə ki,kəşti qıləy təhlukəninə cihoze,əmmo çımisə həm vey təhlukənin həmonə kəşti bə dıyo bın ğandey zınə silohe.

Bə AİŞ prezdenti çe İnğılobiku 47 sori dəvardey rəğmən İslomi Respublika məhf kardey nızıney etiraf kardey işorə kardə Həzrət Ayətullah Xameneyi təkidışon kardə:"Im,qıləy çokə etırofe.Həlbəttə ki,mı votedəm ki,şımə ımi həm kardey nibəzıniyon,çunki İslomi Respublika çı xalğiku co hukumət ni,bəlkəm bə qıləy bəyjiyə milləti peştıpure."